Ыам ыйын 29 күнүгэр Чуукаардааҕы П.П.Иннокентьев аатынан култуура уонна сынньалаҥ пааркатыгар А.Ф.Алексеев аатынан орто оскуолатын 4 кылааһын, оскуола алын сүһүөҕүн бүтэрэллэрин бэлиэтиир дьоро күн буолла.
Барыта 16 үөрэнээччи сиэттиспитинэн кэлэр үөрэх дьылыгар орто сүһүөх үөрэнээччилэрэ буолуохтара. Сэттэ оҕо 4-5 сыаналарынан түмүктээтилэр.Бастакы кылаастан ийэ тэҥэ киһилэрэ, маҥнайгы учууталлара Надежда Кимовна Николаева долгуйа оҕолорун өссө биир үктэли өрө дабайан үөрэхтэригэр, олохторугар ситиһиилээх буолалларыгар алҕаата.
Бу кылаас оҕолоро араас күрэхтэргэ, олимпиадаларга, НПК-ларга, конкурустарга мэлдьи уһулуччу ситиһиилээхтэр.Ол курдук быйыл биир улахан ситиһиилэрэ оройуоннааҕы театр күрэҕэр «Көтөрдөр мунньахтара» айымньыны ситиһиилээхтик оонньооннор оройуоҥҥа I миэстэ буолбуттара.
Араас бириистэри,грамоталары, бэлэхтэри тутан оҕолор сүргэлэрэ көтөҕөллэн, тэрээһиҥҥэ көхтөөхтүк кыттан оонньоон-көрүлээн тарҕастылар.
Надежда Казакова,Чуукаар