Алтынньы 1 күнүттэн – Аҕам саастаах киһи аан дойдутааҕы күнэ. Алтынньы 1-10 күннэригэр декада кэмигэр Ньурба улууһугар аҕам саастаахтарга анаан араас тэрээһиннэр ыытылыннылар.
Бүгүн, алтынньы 10 күнүгэр улуустааҕы Киин балыыһа поликлиниката 60+ саастаахтарга анаан аһаҕас аан күнүн тэрийэн ыытта.
Сарсыарда эрдэттэн Ньурбатааҕы медколледж студеннара кэлбит дьоҥҥо анкета толоттордулар. Ол кэнниттэн анаалыс туттарааһына, антропометрияны, ФЛГ, маммографияны, ЭКГ-ы аастылар. Харахтарын, сүрэхтэрин бэрэбиэркэлэттилэр.
Киин балыыһа мэдиссиинискэй профилактикатын бырааһа Егорова Наталья Анатольевна:
«Бүгүн аҕам саастаахтар сарсыарда уопсай анаалыһы таһынан биохимия, онкомаркер туттардылар, ким баҕалаах дьаҥ ыарыытыттан харыстанар вакцина ылла. Ол кэнниттэн исписэлиистэринэн сылдьан бэйэлэрин көрдөрүннүлэр. Бүгүҥҥү күҥҥэ эндокринолог, кардиолог, травматолог-ортопед быраастар аҕам саастаахтары көрдүлэр-иһиттилэр. Уопсайа 36 аҕам саастаахтар бэйэлэрин доруобуйаларын бэрэбиэркэлэннилэр».
Антонина Семенова