Уһун кэмҥэ бырааһа суох кыһалҕалаах олорбут ыраах сытар нэһилиэккэ идэлээх быраастар кэлэллэрэ мэлдьи кэтэһиилээх уонна үөрүүлээх сонун буолар.
Ыам ыйын 14 күнүгэр Бордоҥ нэһилиэгэр рейсовай вертолётунан икки терапевт-быраас, оройуон кылаабынай бырааһа Артем Михайлович Ксенофонтов ыҥырыытынан, «Земский доктор» уонна «Нюрбинский доктор» бырагыраамаларынан ананан үлэлии кэллилэр.
Кинилэри оройуон баһылыга Алексей Михайлович Иннокентьев авиапорка киирэн, ситиһиилээх үлэни баҕаран туран атаартаата. Ону таһынан, нэһилиэк олохтоохторо уонна врачебнай амбулатория кэлэктиибэ саҥа үлэлии кэлбит быраастарга, күүс-көмө, өйөбүл буолуохтара, үс нэһилиэк олохтоохторун эмтээн уһун кэмҥэ үлэлииллэрин хааччыйыахтара диэн эрэлин биллэрдэ.
Ол курдук Любовь Борисовна Чамбыт уонна Аржаана Конгар-ооловна Монгуш 3 о5отунаан уонна кэргэнинээн Кежик Олегович Монгуштуун көтөн кэллилэр. Нэһилиэк баһылыга Прокопий Юрьевич Степанов үлэлии кэлбит быраастары көрсөн амбулатория кэлэктиибин кытта билиһиннэрдэ.
Олорор усулуобуйаларын эрдэттэн тэрийэн, олохтоох дьаһалта уонна балыыһа үлэһиттэрэ дьиэлэрин бэлэмнээн, тус туспа толору хааччыллыылаах квартиралары туттардылар. Быраастар олорор дьиэлэрэ ыаллыы турар, чугас. Элбэх оҕолоох быраас дьиэ кэргэнигэр икки квартира холбонно, онон олорорго, оҕо сүүрэригэр-көтөрүгэр оһуобай киэҥ-куоҥ дьиэ буолан биэрдэ. Оҕолор туспа хостонобут диэн үөрүүлэрэ үгүс. Дьиэ аттыгар оҕо площадкалаах, сынньанар сирдээх, теплица, хортуоска олордор буолалаах.
Ити курдук, баар кыахпытынан сөптөөх усулуобуйа тэрийэн, ыраах сиртэн айаннаан кэлбит быраастарбыт өр кэмҥэ нэһилиэкпитигэр олохсуйан үлэлиэхтэрэ диэн эрэнэр эрэлбит сүппэт.
Түгэнинэн туһанан, нэһилиэкпит кыһалҕатын кыһамньылаахтык быһаарбыт оройуон баһылыгар Алексей Михайловичка уонна оройуон кылаабынай бырааһыгар Артем Михайловичка Бордоҥ нэһилиэгин дьонун-сэргэтин аатыттан улахан махталбытын тиэрдэбит.
Надежда Чемпосова, «Бордоҥ нэһилиэгэ» тыа сирин түөлбэтин дьаһалтата