Сэтинньи 5 к. тыа хаһаайыстыбатын департаменын иһинэн Уопсастыбаннай сэбиэт бастакы сүбэ мунньаҕа буолан аста. Бу Сэбиэт алтынньы саҥатыгар улуустааҕы тыа хаһаайыстыбатын департаменыгар сүбэлиир-амалыыр уопсастыбаннай уорган быһыытынан тэриллибитэ. Уопсастыбаннай сэбиэт 21 киһилээх, манна тэриллиилээх хаһаайыстыбалар, астыыр-үөлүүр уонна соҕотуопка тэрилтэлэрин салайааччылара, тыа хаһаайыстыбатын бэтэрээннэрэ киирбиттэрэ.
Улуустааҕы тыа хаһаайыстыбатын департаменын салайааччыта Леонид Ушканов кыстыкка киирии туһунан иһитиннэрдэ. Сүбэ мунньахха итини сэргэ кэлэр сылтан өрөспүүбүлүкэ улуустарыгар тыа хаһаайыстыбатын сорох боломуочуйалара бэриллиитэ, итини ону олоххо киллэрии механизмын туһунан дьүүллэстилэр.
«Кэлэр сылга СӨ тыатын хаһаайыстыбатын туһунан сокуоҥҥа уларытыылар киирдэхтэринэ, үлэбитин-хамнаспытын итиннэ сөп түбэһиннэрэн үлэлиирдии былааннанабыт, мунньахха бу туһунан сиһилии кэпсэттибит, — диир Леонид Владимирович. — Сүрүн боппуруоһунан үүт соҕотуопкатын былаанын уонна үүт тутуллар сыанатын улаатыннарыы туһунан кэпсэтии буолла. Төрүүр ынахха көрүллэр субсидия боппуруоһун эмиэ таарыйдыбыт. Итинэн сүбэлэһии түмүктэммэт, салгыы нэһилиэктэр кыттыылаах кэпсэтии салҕаныаҕа».
Геннадий АНТОНОВ