Ахсынньы 3 к. «Ньурба улууһа» МО дьокутааттарын 22-с уочараттаах сиэссийэтэ ыытылынна.
Барыта 4 боппуруос көрүлүннэ. Бастакы икки боппуруоһунан дьокутааттар улуустааҕы үп управлениетын салайааччытын солбуйааччыта Александра Васильева быйылгы уонна 2026-2027 сс. былааннаах кэмҥэ улуус бүддьүөтүгэр уларытыылары киллэрии; эһиилги уонна 2028 с. диэри былааннаах кэмҥэ улуус бүддьүөтүн туһунан иһитиннэриилэрин истэн, дьүүллэһэн баран бигэргэттилэр.
3-с боппуруоһунан СВО кыттыылаахтарыгар уонна кинилэр дьиэ кэргэттэригэр босхо бэриллэр сир учаастактарын реестригэр уларытыылары киллэрии туһунан улуустааҕы баайга-дуолга сыһыаннаһыы уонна муниципальнай атыылаһыы кэмитиэтин бэрэссэдээтэлин солбуйааччыта Владислав Васильев иһитиннэрдэ. Антоновка Крахмалыгар арендаҕа бэриллэн баран туһаныллыбакка турар сир учаастактарын ылан СВО кыттыылаахтарыгар биэрэргэ 10 сир учаастактарын таһаарбыттар. Дьокутааттар ити боппуруоһу дьүүллэһэн баран эмиэ бигэргэттилэр.
«Разное» диэн бэбиэскэҕэ киирбит боппуруоска улууспут символикатын туһунан кэпсэтии буолла. Билигин улууспут гимнин быһыытынан туттулла сылдьар Сергей Васильев-Борогонскай тылларыгар уонна Егор Поликарпов мелодиятыгар «Киэҥ Ньурба» ырыа РФ Геральдическай сэбиэтинэн бигэргэтиллибэтэх, ахтылҕан ырыатын быһыытынан биллэр.
Егор Поликарпов тыыннааҕар улуус гимнин уларытарга эппит, бэйэтэ мелодиятын суруйан хаалларбыт. Улууспут Өрөгөй ырыатыгар сыһыаннаан нэһилиэнньэттэн элбэх этиилэр киирэллэр.
Итини барытын учуоттаан улууска СӨ үтүөлээх артыыһа Илья Николаев салайааччылаах оробуочай хамыыһыйа тэриллэн үлэлээн, хас да ырыаттан сыымайдаан Е.М.Поликарпов «Дойду бэрдэ – Ньурба сирэ» ырыатын талан ылбыттар. Ньурбатааҕы искусство оскуолатын ансаамбыла ыллаабыт видеотын көрдөрдүлэр.
Дьокутааттар итини көрөн-истэн, ырыа тыллара уонна мелодията үчүгэйин, улууспут билиҥҥи олоҕор-үлэтигэр сөп түбэһэрин бэлиэтээтилэр. Бу ырыа туһунан улуус олохтоохторугар иһитиннэрэн, билиһиннэрэн баран кэнники улуус дьокутааттарын Сүбэтин сиэссийэтигэр көрүөхтэрэ.
Салгыы Ньурба улууһун былааҕар уонна гербэтигэр сыһыаннаан, улуус баһылыгын социальнай боппуруостарга солбуйааччыта Наталия Петрова иһитиннэрии оҥордо. Биир кэмҥэ Ньурба улууһун икки былааҕа туттулла сылдьар. Онтон биирэ – халлаан күөх фоннаах былаах дойду Геральдическай Сэбиэтинэн бигэргэтиллибит официальнай былаахпыт буолар.
От күөх, маҥан уонна халлаан күөх фоннаах былаах Геральдическай сэбиэтинэн бигэргэтиллибэтэх, аны улууспут гербэтигэр ойуута сөп түбэспэт буолан дойду Геральдическай Сэбиэтинэн кыайан бигэргэтиллэр кыаҕа суоҕун туһунан эппиттэр.
Онон мантан инньэ халлаан күөх фоннаах былаахпыт бары официальнай тэрээһиннэргэ уо.д.а. түгэннэргэ туттуллан барыахтаах.
Сиэссийэни салайан ыыппыт улуус дьокутааттарын Сүбэтин бэрэссэдээтэлэ Нюргуяна Михайлова улууспут гербэтигэр улуустааҕы оробуочай хамыыһыйа Геральдическай сэбиэти кытта үлэлэһиэҕин, кыра уларыйыы тахсыаҕын туһунан бэлиэтээтэ.
Бу этиллэр уларыйыылары оробуочай хамыыһыйа кэлэр сыл саҥатыгар улуус дьокутааттарын Сүбэтин көрүүтүгэр киллэриэхтээҕэ этилиннэ.
Геннадий АНТОНОВ.