Ахсынньы 20 к. Ньурбаҕа мелиорация тэрилтэтэ тэриллибитэ 60 сылыгар аналлаах тэрээһиннэр үрдүк таһымнаахтык ыытылыннылар.
Ол чэрчитинэн Ньурба к. Чусовской уул. Мелиорация управлениетын Ньурбатааҕы филиалын хонтуоратын аттыгар экскаватор пааматынньыга үөрүүлээх быһыыга-майгыга аһылынна.
Манна СӨ тыатын хаһаайыстыбатын уонна аска-үөлгэ бэлиитикэтин миниистирин солбуйааччыта Сахаяна Павлова, ТХМ иһинэн Мелиорация управлениетын салайааччыта Дмитрий Махаров, улуустардааҕы мелиорация тэрилтэлэрин салайааччылара, ыраахтан-чугастан анаан-минээн кэлбит тэрилтэ бэтэрээннэрэ, улуус уонна Ньурба куорат салайааччылара кыттыбыттара тэрээһин суолтатын үрдэттэ.
Итинэн Ньурба улууһугар мелиорация эйгэтигэр үлэлээн хамсаан ааспыт дьон ааттара үйэтитилиннэ. Бу экскаватор Ньурбаҕа 1988 с. аҕалан 22 сыл устата үлэлээбит эбит. Бастаан механизатор Капустин Николай Викторович сатабыллаах илиитигэр тиксибит, онтон кэлин 2010 с. диэри Василий Семянов оскуолаҕа үөрэнэр уолун Зиновийы кытта үлэлээбиттэр.
Инникитин манна Мелиоратордар сквердэрэ оҥоһуллара былааннанар, тэрилтэ номоххо киирбит бастакы салайааччыта Илья Теленков бүүһэ эмиэ манна сыҕарытыллан туруоруллуоҕа. Бу пааматынньык турарыгар Ньурба куорат баһылыга Геннадий Игнатьев, кини солбуйааччыта Павел Необутов, урбаанньыт Петр Ноговицын уонна бу экскаватор хас биирдии чааһын сууйан, хомуйан, кырааскалаан оҥорон Николай Капустин көмөлөстүлэр. Кинилэргэ Мелиорация управлениетын Ньурбатааҕы филиалын салайааччыта Алексей Васильев истиҥ махталын тиэртэ. Мелиорация управлениетын Үөһээ Бүлүүтээҕи филиалын салайааччыта Афанасий Бырдыкаров Николай Капустиҥҥа мелиорация бэтэрээннэригэр аналлаах бэлиэни туттарда.
Геннадий АНТОНОВ