Тохсунньу 21 күнүгэр Чуукаардааҕы Е.М.Поликарпов аатынан «Эйгэ» Норуот айымньытын киинигэр сарсыардаттан олус сэргэх көрсүһүү буолла.
Биир дойдулаахпыт, Российскай Федерация үтүөлээх тренерэ, Саха Өрөспүүбүлүкэтин физическэй култууратын уонна спордун үтүөлээх үлэһитэ, Саха Өрөспүүбүлүкэтин адаптивнай спордун старшай тренерэ, сахалыы спортивнай многоборье маастара Пётр Николаевич Давыдов ыалдьыттаата. Ньурба оройуонугар тэриллибит «Спорт баала» тэрээһиҥҥэ ыҥырыллан кэлбиччэ биир хонукка төрөөбүт нэһилиэгэр сынньанан ааста.
Бириэмэ олох ыгым да буоллар, сарсыарда эрдэттэн сэрээккэлиир бөлөхтүүн тэҥҥэ хамсаһан, оскуола медиа-бөлөҕөр кылгас интервью биэрдэ.
Ол кэннэ үрдүкү кылаас оҕолорун кытары көрсөн олус умсугутуулаах, мотивациялыыр ис хоһоонноох кэпсэтии буолла. Ити кэннэ теннис оонньуур оҕолордуун теннистээн ылла, оҕолор олох үчүгэйдик оонньуулларын бэлиэтээтэ.
Салгыы нэһилиэнньэни кытары көрүстэ. Манна, 2027 с. Ньурбаҕа буолуохтаах Спортивнай оонньууларга бэлэмнэнии үлэлэригэр көхтөөх кыттыыны ыларга сүбэлээтэ. Ити киэҥ далааһыннаах тэрээһин биһиги оройуоммутугар буолара суолталааҕын уонна наадалааҕын чопчулаата. Олус ыгым кэмҥэ да буоллар дойдутун дьонун кытта алтыһан ааспытыттан олус астынарын биллэрдэ. «Аҥардас дойдум салгынынан тыыммытым, улааппыт уулуссабынан хаампытым да күүс эбэр», — диир.
Көрсүһүү түмүгэр бүгүн көрбүтүттэн туохтан үөрбүтүн маннык бэлиэтиир:
«Төһө да спортивнай саалата суох буолларгыт, онон-манан быыс-хайаҕас булан араас көрүҥнэргэ дьарыктанаргыт олус хайҕаллаах уонна үөрдэр. Эдэрдиин-саастаахтыын олорон хаалбат эбиккит. Кырдьаҕас дьоммут тэтиэнэх сылдьаргытыттан киһи үөрэр».
Биһиги, үрдүк спортивнай таһымҥа сылдьар бэйэбит уолбут кытаанах кыраапыгын аттаран бириэмэ кырыйан кэлэн кэпсэтэн-ипсэтэн ааспытыттан наһаа үөрдүбүт, инники былааннара туолалларыгар, чөл сылдьарыгар уонна чаҕылхай ситиһиилэри баҕарабыт.
Надежда Казакова, Чуукаар