СӨ норуоттарын IX Спортивнай оонньууларын көрсө, билигин 2 эбийиэккэ үлэ бара турар.
Чаппандаҕа «Бизнес-спринт» федеральнай бырагырааманан модульнай спорт саалата уонна Ньурба куоракка 3000 миэстэлээх, ичигэс сүүрэр манежтаах стадион.
Стадион тутуутугар үлэлии сылдьар дьоҥҥо тиийэн кэпсэттим. Бу нэдиэлэ саҥатыттан «Сэттэ» тутуу хампаанньата ХЭТ биригээдэтэ стадион каркаһын тутуутун салҕаата.
«Биригээдэҕэ 6 киһи баар, барыта олохтоох уолаттар, итиэннэ мин, оробуочай уонна 2 суоппар, — диир прораб Павел Матвеев. — Тимир конструкция каркаһын хомуйабыт. Ыам ыйыгар бүтүөхтээх. Онтон элбэх үлэһит кэлиэҕэ. Быйыл улахан үлэтин барытын , иһинээҕи отделкатыттан ураты, бүтэриэхтээхпит. Эһиил бастакы кыбаарталга бүтэрэн үлэҕэ киллэрэргэ соруктанабыт. Билигин үлэлиир матырыйаалбыт барыта баар».
Ньурбаҕа сотору бассыайыннаах Физкултуурунай-чэбдигирдэр комплекс тутуутугар биригээдэ кэлиэхтээх. Бу эбийиэк бэдэрээтчитинэн эмиэ «Сэттэ» тутуу фирмата ХЭТ буолар. ФОК үлэтин саҕалыырга анаан хаарын ыраастаабыттар. Үлэтэ саҕаланнаҕына суруйан таһаарыахпыт.
Оттон Чаппандаҕа тутуу бэдэрээтчитинэн Иркутскайдааҕы «Каркас» ХЭТ буолар, тас үлэтин «Нюрбаавтодор» ХЭТ толордо. Спорт саалатын каркаһын бу нэдиэлэҕэ хомуйан бүтэрдилэр, аны административнай өттүн каркаһын саҕалыахтара. Эмиэ олохтоох уолаттар үлэлии сылдьаллар.
Геннадий АНТОНОВ