Бүгүн улуус баһылыгын социальнай боппуруостарга солбуйааччыта, СӨ норуоттарын IX Спортивнай оонньууларын тэрийэр кэмитиэт хос бэрэссэдээтэлэ Наталия Петрова СМИ уонна реклама хамыыһыйатын сүбэ мунньаҕын салайан ыытта.
Сонуннары киэҥник тарҕатар сириэстибэлэр, социальнай ситимнэр көмөлөрүнэн СӨ норуоттарын IX Спортивнай оонньууларын бэлэмнэнии үлэтигэр дьону көҕүлүүр, Спортивнай оонньуулар пуондатыгар үп киириитин күүһүрдэр туһунан сүбэлэһии ыытылынна.
СӨ норуоттарын IX Спортивнай оонньууларын дириэксийэтин бэрэссэдээтэлэ Артур Яковлев нэһилиэктэргэ СМИ үлэтин ырытта, инники соруктарга тохтоото. Аан бастаан нэһилиэктэргэ пропагандалыыр үлэни тэрийэр наадатын, хас биирдии нэһилиэккэ пресс-сулууспа тэриллиэхтээҕин, Спортивнай оонньууларга бэлэмнэнии үлэтин туһунан уонна улуус сонуннара нэһилиэктэр социальнай ситимнэригэр тиһигин быспакка тахса туруохтаахтарын бэлиэтээтэ.
Бастакы сүрүн сорук – нэһилиэктэри тупсарыы үлэтэ. 4 сылга биирдэ буолар саха «Олимпиадатыгар» бэлэмнэнэн нэһилиэктэргэ туһааннаах үлэ барар. Былырыын Ньурба к. дизайн-код бигэргэтиллибитэ. Ньурбаҕа маҕаһыыннар, тэрилтэлэр тас көрүҥнэрин тупсарарга 58 ыйыы сурук тиэрдилиннэ.
Чаппандаҕа 7 ыал административнай хамыыһыйа предписаниетын тутта. Куһаҕан олбуордаах ыаллар Спортивнай оонньууларга олбуордарын көннөрүнүөхтээхтэр, тиэргэннэрин тас өттүгэр ыһылла сытар мас, саһаан суох буолуохтаах. Элбэх мас, сибэкки үүннэриллиэхтээх. Чаппандалар федеральнай суол кытыытыгар лесничествоны кытта мас олордон көҕөрдүү үлэтин ыытаары турунан сылдьаллар.
Ньурбачааннар былааннара эмиэ элбэх. Күндээдэлэр дэриэбинэ аншлагын оҥортороллор. Нэһилиэктэргэ ханнык үлэ барара барыта дьон киэҥ билиитигэр тахсан, тарҕатыллан иһиэхтээх. Спортивнай оонньуулар кэннилэриттэн тэрээһиннэр түмүктэрин ырытыахтара, онно саамай үчүгэй үлэлээх пресс-сулууспаны бэлиэтиэхтэрин сөп.
Иккис сүрүн сорук — Спортивнай оонньуулар пуондатын хаҥатыы. Спортивнай оонньуулары тэрийэн ыытар улуустааҕы дириэксийэ туруорсуутунан пуондаҕа үбү укпут киһиэхэ, тэрилтэҕэ спонсорскай бакыат ырытан оҥоһулунна. Тэрийэр кэмитиэт аатыттан махтал суруктар, өйдөбүнньүк бэлиэлэр баар буолуохтара.
Холобура, пуондаҕа элбэх үбү киллэрбит маҕаһыыннарга, урбаанньыттарга өйдөбүнньүк бэлиэ оҥоһуллар уонна маҕаһыыннарын ааныгар дьон саамай көрөр сиригэр сыһыарыллар. «Ньурба улууһугар маннык спонсордаабыт, маннык бэлиэлээх маҕаһыыннартан эрэ атыылаһа сатааҥ» диэн ис хоһоонноох күүстээх реклама оҥоһуллуоҕа.
СӨ норуоттарын IX Cпортивнай оонньууларыгар көмөлөрүн киллэрэллэригэр Ньурбаттан төрүттээх Дьокуускай куорат олохтоохторугар улахан болҕомто ууруллуоҕа. Манна тэрээһин үлэтэ ыытылла турар.
Муус устар 7 к. Дьокуускайга Ньурба улууһуттан төрүттээх биир дойдулаахтар түмсүүлэрин салайааччыта, Ил Түмэн дьокутаата Георгий Балакшин, Ил Түмэн дьокутааттара Владимир Прокопьев, Ю.М.Николаев, СӨ сэрии, үлэ, сэбилэниилээх күүстэр, быраабы араҥаччылыыр уорганнар бэтэрээннэрин Сэбиэтин бэрэссэдээтэлэ Аркадий Саввинов уо.д.а кыттыылаах землячество Президиумун мунньаҕа ыытылынна. 21 киһилээх землячество Сэбиэтэ тэриллиэхтээх.
Улуус баһылыга А.М.Иннокентьевы кытта сүбэлэһэн, IX Спортивнай оонньуулар Ньурбаҕа саҕаланыахтарын оруобуна 1 сыл иннинэ Дьокуускайга олорор биир дойдулаахтарбытын түмэн улахан тэрээһин ыытыллыаҕа.
Дьокуускайга олорор биир дойдулаахтарбытын төрөөбүт нэһилиэктэрин кыһалҕаларыгар чугаһатарга, нэһилиэктэр пресс-сулууспалара нэһилиэк олоҕун, үлэтин-хамнаһын, инники былааннарын тиһигин быспакка кэпсии-сырдата турара улахан суолталаах.
Имидж бэлиитикэтин хамыыһыйата Спортивнай оонньууларга улахан далааһыннаах тэрээһиннэргэ чопчу бырайыактаах. Барыта чуолкайдаммытын кэннэ, тоҕоостоох кэмигэр ити иһитиннэрии тахсыаҕа.
Сүбэ мунньахха Ньурба куорат уонна нэһилиэктэр СМИ-гэ эппиэтинэстээх үлэһиттэрин информациялара истилиннэ. Үлэ тэрээһинин күүһүрдэр туһунан көдьүүстээх кэпсэтии таҕыста.
«Ньурба улууһа» МО дьаһалтатын пресс-сулууспата.