Ньурбабыт улууһугар ыытыллар IX Спортивнай оонньууларга путевка ылбыт спортсменнарбытын билсиһиннэрии рубрикабыт иккис ыалдьытынан Алена Антонова буолар.
Алена дьахталларга волейболга улууспут сүүмэрдэммит хамаандатын чилиэнэ, биир бастыҥ хамаанда оонньооччутунан буолар.
Кэлиҥҥи сылларга волейбол көрүҥэ улууспутугар олус сайдан, таһаарыылаахтык үлэлээн үгүс ситиһиилэннибит. Алена Ньурбабыт улууһугар кийиит буолар. Кэргэнэ Айхаан көҥүл тустууга Арассыыйа спордун маастара, хапсаҕайга Саха өрөспүүбүлүкэтин маастара, Ньурбабыт улууһун билиҥҥи кэмҥэ биир чаҕылхай спортсменынан, эдэр салайааччынан буолар.
— Алена, Айхаан, ааҕааччыларга бэйэҕит туһунан билсиһиннэриҥ эрэ.
— Антонов Айхаан диэммин. 1994 сыллаахха Ньурба улууһун Чаппанда нэһилиэгэр күн сирин көрбүтүм. Кыра сааспыттан спордунан дьарыктанан, интэриэһиргээн 6 кылааска Чурапчытааҕы спортивнай интернат-оскуолаҕа эт-хаан өттүнэн сайда, үөрэнэ барбытым.
Ааспыт сылтан төрөөбүт Ньурбам улууһугар кэлэн, спорт сайдыытыгар кылааппын киллэрэн үлэлии-хамсыы сылдьабын. Ньурбатааҕы оҕо спортивнай оскуола дириэктэринэн үлэлиибин.
Мин Калачева Алена, кэргэмминэн Антонова, 1998 сыллаахха Чурапчы улууһугар Чурапчы сэлиэнньэтигэр күн сирин көрбүтүм. Биһиги Айхаанныын иккиэн бииргэ Д.П Коркин аатынан Чурапчытааҕы республиканскай спортивнай орто интернат-оскуолаҕа үөрэммиппит. Мин 4 сыл кыра кылааска үөрэммитим.
Оскуола саҕаттан билсэн, доҕордоһон 2022 сыллаахтан сүрэхпитин холбоон, 2024 сылга ыал буолбуппут. 2025 сыллаахха кэтэһиилээх кырачаан кыыс оҕобут күн сирин көрбүтэ, билигин аҕыс ыйа. Мин бэйэм Саха өрөспүүбүлүкэтин гражданскай оборуонатын уонна нэhилиэнньэ олоҕор-дьаhаҕар куттал суох буолуутун хааччыйар министиэристибэҕэ исписэлииһинэн үлэлиибин, билигин кыыспын көрөн дьиэҕэ олоробун.
— Спорт эйгэтигэр хаһааҥҥыттан дьаныардаахтык дьарыктанан саҕалаабыккытый?
— Эппиппит курдук, Чурапчы спорт оскуолатыгар үөрэммиппит, онтон спорка дьаныардаах дьарык саҕаламмыта. 5 кылаастан волейболунан дьарыктанабын, маҥнайгы тренербынан Оконешникова Саргылаана Семеновна буолар. Кэлин оскуола кэннэ Глухарева Мария Руслановнаҕа дьарыктаммытым.
Оскуола кэмнэригэр Чурапчы улууһун сүүмэрдэммит хамаандатыгар, маны тэҥэ Саха өрөспүүбүлүкэтин оҕолорго сүүмэрдэммит хамаандатыгар, устудьуоннуур кэмнэрбэр Хотугулуу-Илиҥҥи федеральнай университет, Саха өрөспүүбүлүкэтин сүүмэрдэммит хамаандатыгар 2022 сылга диэри оонньообутум. Кэлиҥҥи сылларга «Хотой» волейбол кулууба тэринэн оонньуу сылдьабыт.
Онтон мин спорка кырабыттан сыстаҕас этим, бастакы тренерым Додохов Александр Иванович спорт эйгэтигэр миигин аҕалбыта. Онтон Васильев Иван Ильич көҕүлээһининэн, оҕолорун кытта бииргэ миигин Чурапчы улууһугар үөрэттэрэ илдьэ барбыта. Онно тиийэн бастаан Иннокентьев Андрей Валерьевичка дьарыктаммытым, биһигини, Ньурба оҕолорун, күүскэ дьарыктаабыта. Онтон Иванов Александр Олегович салалтатынан дьарыктанан үгүс ситиhиилэммитим, Саха сирин көҥүл тустууга сүүмэрдэммит хамаандатыгар киирэн 2022 сылга диэри тустубутум.
— Алена, Ньурбабыт улууһун волейболга хамаандатын биир бастыҥ оонньооччутунан буолаҕын, ситиһиилэргит туһунан сырдатыаҥ дуо?
— Ньурба улууһун волейболга дьахталларга сүүмэрдэммит хамаандатын үгүстэрэ бары устудьуоннуур сылларбытыгар тэҥҥэ оонньообут кыргыттарым буолаллар. Бары хамаанданан бииргэ оонньуохпутун баҕараммыт, 2023 сыллаахха Айхаан Ньурбатааҕы спорт управление салайааччыта Роберт Александровичтыын үлэлэһэн, хамаанда састаабын тэрийбиппит.
Сылын ахсын ыытыллар күрэхтэргэ куруутун үс бастыҥнар ааттарыгар киирэ сылдьабыт. Билигин өрөспүүбүлүкэҕэ волейбол таһыма олус үрдүк, хамаандалар бары күрэхтэргэ олус бэлэмнээх кытталлар. Быйылгы сезонтан хамаандабыт тренерынан Жерготов Айсен салалтатынан дьарыктанан саҕалаатыбыт. Путевка ылыы иһин киирсиигэ Ньурба улууһугар кэлбит хамаандалар бары да күүстээх хамаанда кэлбиттэрэ, үрдүкү лига хамаандалара бары да тэбис тэҥнэр. Ол эрэн путевка ылары ситиһэн, билигин күүстээх дьарык, бэлэмнэнии күүтэр.
— 2027 сылга буолар Спортивнай оонньуулартан тугу күүтэҕит?
— Ньурбабыт улууһугар буолар оонньууттан үгүс кыайыыны-хотууну күүтэбит. Дойдубутугар, сирбитигэр-уоппутугар буолар улахан тэрээһиҥҥэ улууспут хамаандата инники күөҥҥэ сылдьан, бастыҥ көрдөрүүлэр кэлиэхтэрэ диэн күүтэбит уонна эрэнэбит.
Спорду доҕор оҥостон улууспутугар спорт сайдыытыгар үлэлэһэр, волейбол, көҥүл тустуу курдук дьон сэҥээриитин ылар спорт көрүҥнэрин тарҕатааччы спортсменнарбытыгар, эдэр салайааччыга таһаарыылах үлэни, спорка үрдүк чыпчааллары баҕарабыт!
Ньурбатааҕы спорт управление пресс-киинэ