Кэбээйигэ бүгүн Олоҥхо дьиэлэрин ситимнэрэ бииргэ үлэлэһэр туһунан 5 сыллаах сөбүлэҥи баттаһан, киэҥ далааһыннаах үлэни түстээтилэр, өссө биир сайдыыга хардыы оҥордулар.
Маны сэргэ, Ньурба култууратын хамаандата Киэҥ Ньурбабыт бастыҥ «Сааллаах көйөр кымыс күүгэн күрэҕин» сиэрин-туомун Кэбээйи сиригэр-уотугар көрдөрөн, дьон-сэргэ биһирэбилин ыллылар.
Бүгүҥҥү күрэхтэр түмүктэрин билиһиннэрдэххэ:
«Кырсалыы кылыһахтаан, Куоҕастыы куйуһутан, тахсар күн сардаҥатынан олоҥхолоох олоҕу туойдахпына…» олоҥхону толорооччулар күрэстэригэр биирдиилээн толорууга Семенова Айна «Түһүлгэ олоҥхоһута» анал аат, Семенов Никита-Куорсун «Түөлбэ олоҥхотун толорооччу» анал аат хаһаайыннара буоллулар.
Олоҥхону бөлөҕүнэн толоруу күрэҕэр «Уйусхан бөлөх» «Олоҥхо этиитин тэтимэ» анал ааты ылла.
«Аламай Күн алыптаах үҥкүүтэ» оһуокай тылын этээччилэр күрэстэригэр Семенова Элеонора «Иэйиилээх этээччи» анал ааты, Иванова Вероника «Кэскиллээх этээччи» анал ааты, Семенов Никита-Куорсун «Дьаныардаах этээччи» анал ааты ылары ситистилэр.
Тойуксуттар «Алгыстаах тойукпут айхаллыы дуорайдын» күөн күрэстэригэр Михайлов Алексей уонна Платонов Валерий Анал ааттарынан бэлиэтэннилэр.
«Хомус хомуһун дорҕоонноро» хомусчуттар күрэхтэригэр бөлөҕүнэн толорууга Марфа, Валерий Платоновтар 1 үрдэли ылан 30000 солкуобайынан наҕараадаланнылар. Биирдиилээн толорууга Платонова Марфа «Төрүт дорҕоон»* анал аакка тигистэ.
Хомуһу үгэскэ олоҕуран Киренскай А.А. ньыматынан «Үргэл» хомуһу оҥорууга Афанасьев Ариан- Арыйаан Уус Анал Аат хаһаайына буолла.
Тимир уустара үгэһи тутуһан хомуһу оҥорууга «Хомус үөскүүр дьиктитэ» күрэстэригэр Афанасьев Ариан-Арыйаан Уус II үрдэлгэ тахсан 20000 солкуобай харчынан наҕараадаланна.
Ариан Афанасьев-Арыйаан Уус «Күкүр Уус» алтантан бөҕөх оҥоруу күрэҕэр — III үрдэл, уус-уран быһах күрэҕэр, быыстапкаҕа анал аат, Болгуо батыйа күрэҕэр Ариан Афанасьев батыйатынан Николай Саввинов кыттан III үрдэл буолла. Саввинов Иван болгуо быһах күрэҕэр анал ааты, Саввинов Николай уус-уран быһах күрэҕэр анал ааты ылары ситистилэр.
«Куйаар кутуллар дорҕооно» кылыһах кырыымпаҕа оонньооччулар күрэстэригэр Михайлов Алексей «Кэскиллээх кылыһах кырыымпаһыт» анал ааты ылла.
«Киристэпиэл кэрэхсэлэ» дэгэрэҥ ырыаны биирдиилээн толоруу күрэҕэр Семенова Элеонора анал ааты ылла.
Өбүгэбит төрүт үгэһин илдьэ сылдьар эрчимнээх, талааннаах дьоммутугар, ыччаппытыгар төлөннөөх эҕэрдэбитин ыытабыт! Сайдан иһиҥ, саҥа саҕахтары арыйыҥ, үрдүк үктэллэри дабайыҥ!
Ньурба оройуонун култуураҕа уонна ыччат бэлиитикэтигэр департамена