Маалыкай орто оскуолатыгар сыралҕаннаах куйаас сайын кэннэ, күүс-сэниэ эптэн, буһан-хатан, Билии күнүгэр аналлаах үөрүүлээх туруубутугар саңа үөрэх дьылын көрсө, оҕолор, учууталлар, төрөппүттэр уонна ыалдьыттар бары тоҕуоруһа, долгуйа муһуннубут.
Быйылгы туруубут уратыта — бочуоттаах ыалдьыт буолла. Ол курдук, биһиэхэ улууспут Аҕа баһылыга Алексей Михайлович Иннокентьев ыалдьыттаата, ону сэргэ маҥнайгы кылаас боруогун атыллаабыт кырачаан
үөрэнээччилэргэ улуус дьаһалтатын аатыттан сэмэй бэлэҕин туттарда уонна оскуоланы бүтэрэр выпускниктарбытыгар үтүө баҕа санааларын тириэртэ.
2026-2027 сыллааҕы үөрэх дьылыгар Михаил Мегежекскэй аатынан Маалыкай орто оскуолатыгар 224 оҕо үөрэнэ киирдэ. Оскуолабытыгар 77 үлэһит күннэтэ кыһаллан үлэлиир, онтон 41 учуутал, быйыл 23 оҕо оскуолабыт кыһатыттан киэң олоххо көтөн та5ыста, 16 оҕо маңнайгы кылаас билии байҕалын сомсо киирдэ. Барыы-кэлии өттүгэр маннык көрдөрүү таҕыста: 12 оҕо барбыт, 7 оҕо кэлбит. Быйылгы үөрэх дьылыгар үс саҥа учуутал үлэҕэ киирдэ, физика учууталынан Семен Ильич Саввинов ананна, логопедынан Елена Тимофеевна Ксенофонтова уонна технология учууталынан Евгений Иванович Яковлев үлэлэрин саҕалаатылар. Уратыта диэн бары Маалыкайга улааппыт, үөрэммит эдэр специалистар.
Сайын устата кэлэктиип сынньалаҥ эрэ өттүн өрө туппакка, үс араас таһымнаах бырайыак күрэхтэригэр дьоһун кыайыыны ситистэ. Бу сыралаах, эппиэтинэстээх үлэттэн тахсара кырдьык. Ол курдук, Чернышевскай Н.Г. аатынан Бүлүү педколлеһын гранын кыайаммыт, учуутал, уһуйааччы хайысхатыгар үөрэнэ сылдьар анал кылааспыт 10 оҕотугар 100000 сууммалаах профильнай сменаҕа путевка туттардылар. Нэдиэлэ устата оҕолор учуутал, уһуйааччы идэтин кытта ис өттүттэн билсиһэн, араас хайысхалаах дьарыктарга кыахтарын холонон, сүүс сыллаах педагогика музейыгар экскурсиялаан, толору итии аһылыгынан хааччыллан, сылаас, сымнаҕас «Эрчим» уопсайга сынньанан, олус туһалаахтык бириэмэлэрин атаарыахтара диэн бигэ эрэнэбит. Бу кыайыы хайаан даҕаны оҕолор инники идэлэрин талалларыгар, олохторун суолугар сөптөөх хайысханы тутуһалларыгар төһүү күүс буолуо диэн үс бүк эрэнэбит. Бу таһынан, төрөппүт көҕүлээһинигэр грант күрэҕэр Өрөспүүбүлүкэбит үрдүнэн аҕыс кыайыылаах үөрэх кыһаларын ортолоругар киирсэн 309.404 суумалаах бириэмийэ сүүйэммит үөрүүбүт үгүс. Бу бырайыагы оскуолабыт төрөппүттэрэ көҕүлээн, Нария Афанасьевна Кириллина уонна Наталья Васильевна Слепцова салайыыларынан үлэлэтээри сылдьаллар. Бу курдук, оскуолабытыгар олус сэргэх хамсааһыннар тахсаллар. Туох барыта үһүстээх дииллэрэ, саарбаҕа суох. Ол курдук, Арассыыйа үрдүнэн ыытыллар Тимченко аатынан “Кыах эйгэтэ” диэн аһымал пуонда гранын күрэҕэр сүүс бырайыак кыайбытыттан уон үс бырайыага Сахабыт сиригэр кэллэ, ол иһиттэн иккитэ Ньурба оройуонугар ананна. Альбина Сергеевна Саввинова уонна Парасковья Семеновна Яковлева салайааччылардаах оскуолабыт иһинэн үлэлиир агро хайысхалаах сыах сотору кэминэн үлэтин ньиргиччи саҕалыахтаах.
Быйыл бүтэрбит үөрэнээччилэрбититтэн 22 оҕо устудьуон үрдүк аатын сүктүлэр: 6 оҕо үрдүк үөрэххэ киирдэ, 12 оҕо орто анал үөрэххэ киирдилэр, 4 оҕо техникумңа киирдэ. Маннык ылан көрдөххө, 17 оҕо бюджекка, 5 оҕо төлөбүрдээх үөрэххэ киирбиттэр. Медицинскэй хайысхалаах кылааһы бүтэрбит оҕолор, бары 100% талбыт идэлэринэн үөрэххэ киирдилэр. Бу олус үөрүүлээх көрдөрүү буолар. Манна сытар үрдүк таһымнаах учуутал сырата-сылбата. Светлана Спиридоновна Иванова уонна Наталья Валентиновна Иевлева курдук уопуттаах учууталлардаахпытыттан киэн туттабыт. Кинилэр үөрэппит оҕолоро номнуо быраас үрдүк аатын сүгэн үлэлии-хамныы сылдьаллара көрүөххэ да истиэххэ да астык.
Быйылгы үөрэх дьылыгар оскуолабытыгар саҥа, сонун сүүрээн киирдэ. Ол курдук, орто сүһүөх оҕолоругар фирменнэй кылаастар ананнылар: 5 кылаас – “Агрокласс”, кылаас салайааччыта – Н.А.Кириллина; 6 кылаас – “Экологическэй кылаас”, кылаас салайааччыта – С.И.Васильева; 7 “А” кылаас – “Полицейскэй кылаас”, кылаас салайааччыта – А.З. Борисова; 7 “Б” кылаас – “Спортивнай кылаас”, кылаас салайааччыта – В.К. Тимофеева; 8 “А” кылаас – “Математическэй кылаас”, кылаас салайааччыта – С.В.Семянова; 8 “Б” кылаас – “Социальнай-экономическэй кылаас”, кылаас салайааччыта – Л.В. Тимофеева; 9 кылаас – МЧС кылаас, кылаас салайааччыта – М.В. Самырова. Кылаастары арыйыы үөрүүлээх чааһа балаҕан ыйын бүтэһик күннэригэр былааннанар.
Сайын устата Мондоку маанылаах сиригэр-уотугар 2 сезон лааҕыр таһаарыылаахтык үлэлээтэ, профориентационнай “Профи” уонна успуорт хайысхалаах “Эрэл” лааҕырдарга холбоон 50 оҕо сайынын туһалаахтык атаарда, интэриэстэринэн элбэх саңа үөрүйэҕи иңэриннэ.
Сайын устата сынньаммыт оҕолор, харахтара уоттанан үгүс үтүө билиини ыларга бэлэм кэлбиттэрэ көстөр, учууталлар, төрөппүттэр быйылгы үөрэх дьылыгар былааннара үгүс, онон хардарыта күүстээх үлэ көһүтэр.
Оҕолорбутугар, учууталларбытыгар, төрөппүттэрбитигэр, бары үлэһиттэрбитигэр баҕарабыт саңа үөрэх сылыгар үрдүк ситиһиилэри, кытаанах доруобуйаны, үтүө буолууну!
Бэлэмнээтэ Виктория Васильевна Кононова, дириэктэри иитэр үлэҕэ сүбэһитэ