Анал байыаннай дьайыы маҥнайгы күннэриттэн ыла тыылга күүстээх үлэ-хамнас күөстүү оргуйар. Ол курдук, Сүлэ нэһилиэгин амарах санаалаах олохтоохторо — күн-түүн уолаттарбыт тустарыгар ис сүрэхтэриттэн кыһаллан, биир сомоҕо буолан үлэлииллэр.
Бу кэлэр ыйга улууспут анал дэлэгээссийэтэ байыаннай дьайыы буола турар сиригэр улуус олохтоохторун ааттарыттан көмө баһыылкалары уонна туһааннаах тэриллэри илдьэ уһун айаҥҥа турунуохтаах. Бу улахан суолталаах тэрээһинтэн Сүлэ нэһилиэгин дьоно-сэргэтэ хаһан да туора турбат. Амарах санаалаах ийэлэр, аҕалар, эбээлэр уонна эһээлэр байыастарга күүс-көмө буолар сыалтан куруук тэҥҥэ кыттыһаллар. Нэһилиэккэ харысхал оҥоруута, маскировачнай сеткалары өрүү, саллааттарга анаан сылаас көстүүмнэри тигии үлэтэ быыстала суох бара турар. Тыыл күүһэ — Кыайыы тирэҕэ буоларын өйдөөн, эр дьоммут эмиэ туора турбаттар: кинилэр байыастар дьиэ кэргэттэригэр муус ылыытыгар, оттук мас бэлэмнээһинигэр аналлаах субуотунньуктары куруук тэрийэллэр.
Бу күннэргэ нэһилиэк иһигэр күүстээх сомоҕолоһуу үлэтэ өссө күүһүрдэ. Уолаттарбытыгар анаан маскировачнай сеткалары өрүү хас күн аайы ыытыллар. Бүгүҥҥү күҥҥэ уопсайа холбоон сэттэ устуука 4 миэтэрэлээх уонна сэттэ устуука 6 миэтэрэлээх маскировачнай сетка өрүлүннэ — бу улахан үлэ түмүгэ.
Бэҕэһээ уонна бүгүн нэһилиэк Култууратын дьиэтигэр Сүлэ орто оскуолатын үөрэнээччилэрэ уонна үлэһиттэрэ биир киһи курдук мустан, маскировачнай сеткалары өрсөргө бэйэлэрин кылааттарын киллэрдилэр. Бу 86-с үтүө дьыаланан буолла!
Күүспүт — түмсүүгэ, кыайыыбыт — сомоҕолоһууга!
Марина Герасимова