Улуу Кыайыы 80 сылынан Октябрьскай нэһилиэккэ биир бэлиэ түгэн тосхойдо.
Аҕа дойду сэриитин кыттыылааҕа, III ст. «Орден Славы» бэлиэ кавалера, норуот хаһаайыстыбатын Үтүөлээх үлэһитэ Дмитрий Акимович Васильев дьиэ кэргэнэ, дьоно-сэргэтэ кини аатынан уулусса төрдүгэр ытык киһилэрин аатын үйэтитэн спорт былаһаакката арыйдылар.
Бу ааты үйэтитиини ааһан төрөөбүт нэһилиэк оҕото-уруута, ыччата, олохтоохторо чөл туруктаах буолалларыгар, спорка эбии сысталларыгар кыһаллыы дьоһун бэлиэтэ эмиэ буолар. Баһылык, аҕам саастаахтарбыт, Тыалыкы түөлбэ олохтоохторо, общественность маннык бэлэҕи олус сэҥээрдилэр, санааларын, махталларын үллэһиннилэр.
Үөрүүлээх арыллыыны «Түһүлгэ» норуот айымньытын дьиэтэ тэрийэн ыытта, нэһилиэкпит ыччата, бокс тренерэ Михаил Хатылыков иитиллээччилэринээн тренажердар аналларын сырдаттылар.
Үйэтитии үгэһэ холобур буоллун, ким да умнуллубатын, туох да умнуллубатын!
Октябрьскай нэһилиэк пресс-сулууспата