Түмүк нэһилиэгин Аҕам саастаах дьонугар «Күндү дьоммутугар ис сүрэхтэн» сынньалаҥ киэһэтэ буолан ааста. Бу үтүө күн төрөөбүт нэһилиэктэрин сайдыытын уһансыбыт аҕа көлүөнэ дьоммутугар махтал, эҕэрдэ тыллар этилиннилэр, үтүө үгэс буолбут быйылгы сылга үбүлүөйдээх дьоммутугар тэрилтэлэр, түөлбэлэр сэмэй бэлэхтэрин, эҕэрдэ суруктарын туттардылар.
Ону сэргэ үөрүүлээх тэрээһиҥҥэ сүрэхтэрин сылааһын холбоон 50 сыл бииргэ олорбут педагогическай династия Валентина Давыдовна, Евгений Егорович Федоровтар дьиэ кэргэттэри чиэстээтибит, 1974 сылга Маар оскуолатын бүтэрбит выпускниктар 50 сылларынан , «Алгыс» эбээлэр түмсүүлэрин (сал. СӨ култууратын туйгуна, норуот маастара В В. Егорова) 15 сыллаах үбүлүөйдэринэн истиҥник эҕэрдэлээтибит. Түгэнинэн туһанан кэрэни кэрэһэлиир, үтүөнү түстүүр бар дьоммутун талба талааннаах эбээлэрбит үбүлүөйүнай кэнсиэртэригэр сэтинньи 23 күнүгэр «Алгыс» норуот айымньытын киинигэр күүтэбит.
Бырааһынньыктааҕы тэрээһиммит биир улахан үөрүүлээх бэлэҕинэн буолла, ытыктанар биир дойдулаахтарбыт, үөрэх-билии эйгэтигэр өр сылга таһаарыылаахтык үлэлээбиттэрин сыаналаан оскуола администрацията дириэктэр Артем Иванович бэтэрээн учууталларга Ариша Семеновнаҕа, Александра Спиридоновнаҕа, Людмила Николаевнаҕа «Почетный ветеран системы образования РС(Я)» бэлиэлэри туттартаата.
Мэлдьи буоларын курдук аҕам саастаах күндү дьоммутугар нэһилиэкпит тэрилтэлэрэ, олохтоох дьаһалта бэлэмнээбит минньигэс астаах остуолларын тула олорон ирэ-хоро кэпсэтэн, ылбаҕай ырыалары истэн астынан, оонньууларга кыттыһан, үҥкүүлээн сэргэхсийэн тарҕастылар. Күндү дьоммут кыра да бириэмэҕэ аралдьыйан, санаалара көтөҕүллэн барбыттарыттан астынабыт.
«Алгыс» норуот айымньытын дьиэтэ