Балаҕан ыйын 8-13 күннэригэр Саха сирэ Россия хамаандатын састаабыгар киирэн, Казахстан киин куоратыгар Астанаҕа Аан дойдутааҕы көс олохтоох омуктар 5-с Оонньууларыгар кытынна. 89 араас дойдуттан 2500-тан тахса спортсмен 21 көрүҥҥэ күрэхтэстилэр. Быйылгыттан сахалар төрүт оонньуубут — мас-рестлинг бу күрэх бырагырааматыгар киирэн үөрүүбүт үгүс. Биһиги Ил Дархаммыт Асйсен Николаев «Көс олохтоох омуктар оонньуулара спортивнай күрэх эрэ буолбакка, бу бүтүн аан дойду сомоҕолоһуута, биир буолуута уонна сибээһи олохтооһуна» диэбитэ оруннаах.
Саха сирин хамаандата казах норуотун оонньууларын «Асык ату», «Бес асык» (хаамысканы оонньооһун), «Тогызкумалак» (интеллектуальнай), «Овари» (Арҕаа Африка интеллектуальнай оонньуута), ох саанан ытыы, мас-рестлинг көрүҥнэригэр кытынна. Тыҥааһыннаах киирсиилэр кэнниттэн биһиги хамаандабыт Бес асыкка, Овари оонньууларга 2-с, Тогыз кумалакка, мас-рестлиҥҥнэ, оҕунан ытыыга 3-с бочуоттаах миэстэлэри ылан, биир күүстээх хамаанда буоларын көрдөрдө. Күрэх кылаабынай судьуйата Тастанбек Есентаев «олус күүстээх, бэлэмнээх хамаанда кэлбит» диэн сөхпүтүн биллэрдэ.
Бу оонньуулары көрө-истэ, билэ, таарыччы бэйэбит төрүт оонньууларбытын – хабылыгы уонна хаамысканы билиһиннэрэ-көрдөрө, бу аан дойдутааҕы күрэххэ ыҥырыллан, СӨ хабылык уонна хаамыска Федерациятын бэрэсидьиэнэ О.Григорьева, Федерация толорооччу директора А.Андросова көҕүлээһиннэринэн, тренер Э.Николаева, бу көрүҥҥэ Саха сирин спордун маастардара Н.Троева, Н.Данилова (Үөһээ Бүлүү), Л.Иванова (Ньурба), Н.Никифорова (Сунтаар) бара сырыттыбыт.
«Этноаул» диэн национальнай -култуурунай комплекс улахан, киэҥ юртатыгар күрэх кыттыылаахтарыгар, ыалдьыттарга, олохтоохторго хабылык, хаамыска оонньуубутугар маастар-кылаас көрдөрдүбүт. Барыта 1 тыһ. тахса киһи кэлэн көрдө, үөрэннэ. Түмүккэ хабылыкка күрэх ыыттыбыт, элбэх киһи суруйтаран оонньообута сөхтөрдө уонна үөртэ. Кыайыылаахтарга илдьэ кэлбит сувенирдарбытын туттардыбыт.
Ньурба Дьаарханыттан сылдьар, Мединститут устудьуона, улуус хабылыкка уонна хаамыскаҕа сүүмэрдэммит хамаандатын чилиэнэ Кристина Терентьева бу аан дойдутааҕы күрэххэ 2 көрүҥҥэ 2-с миэстэлэри ылан мэтээлинэн, дипломунан наҕараадаланна уонна харчынан бириэмийэлэннэ.
Биһиги төрүт оонньууларбыт – хабылык уонна хаамыска мустубут дьоҥҥо улахан интэриэһи тарта. Баҕар, инникитин бу оонньууларбыт Аан дойдутааҕы көс олохтоох омуктар күрэхтэригэр биир көрүҥ быһыытынан киириэҕэ диэн эрэнэбит.
Ньурба улууһун төрүт остуол оонньууларын Федерацията