Улууспут эдэр эрчимнээх, эргиччи талааннаах, бииртэн биир ураты туспа көрүүлээх дьонунан-сэргэтинэн баай. Биир оннук эрчимнээх, айар талааннаах, үгүс элбэх бырайыактар ааптардарынан Айталина Камилова буолар.
Айталина 2024 сылга ыытыллыбыт «Азия оҕолоро» норуоттар икки ардыларынааҕы оонньууларга атташе быһыытынан иккиһин үлэлээтэ. Биһиги Ньурбабыт улууһугар 2027 сылга ыытыллыахтаах Саха өрөспүүбүлүкэтин норуоттарын IX Спортивнай оонньууларын бары да сэҥээрэ күүтэбит. Бу оонньуулары уонна улууспут төрүттэммитэ 200 сылын, киэн туттар биир дойдулаахпыт Артур Иннокентьевич Пахомов 70 сыллаах үбүлүөйдээх күнүн көрсө, 2024 сыл олунньу 16 күнүгэр «Навстречу играм» диэн спортивнай общественнай фонд тэрийэн Айталина үлэтин саҕалаабыта.
Фонд үлэтэ-хамнаһа, сыала улууска спортивнай олоҕу кытта дьүөрэлээн бу оонньууларга диэри бэлиэ түгэни хатаан хаалыы буолар. Фонд чилиэннэрэ фонд эмблемэлээх өйдөбүнньүк бэлэхтэри спорка ситиһиилэммит спортсменнарга В.И.Степанов-Буучугурас аатынан өрөспүүбүлүкэтээҕи хапсаҕай турнирыгар 3 миэстэлээх, муҥутуур кыайыылааҕы быыһарарга ааттаах-суоллаах бөҕөстөрү туораталаан финалга Никита Хабаровтыын киирсибит Тимур Васильевка, мас тардыһыытыгар Күүстээх Дэһээккин аатынан өрөспүүбүлүкэтээҕи чемпионакка үрүҥ көмүс призер Аржаков Джулустаҥҥа, боруонса призер Воронов Виталийга туттарбыттара.
Бу күрэххэ Джулустан Анатолий Баишевы, Виталий Семен Ануфриев курдук ааттаах-суоллаах мадьынылары кыайан, этэргэ дылы сенсация олохтообуттара. Кыайыы күнүгэр тэрилтэлэринэн эстафетаҕа бастыҥ сүүрүгүнэн быһаарыллыбыт баһаарынай Александр Андреевка, спонсорство быһыытынан оҕолорго улуустааҕы футбол күрэҕэр бэлэхтэр туттарыллыбыттара.
Быыһыыр сулууспа күнүн көрсө, 2024 сыл түмүгүнэн улуус 10 бастыҥ спортсменнарыттан биирдэстэрэ Николай Обоевка, улуустааҕы ыччат политикатын управлениета 2024 сылы түмүктээн «Пресса года» анал аат кыайыылааҕа, улууска спорт эйгэтин сырдатааччы Динара Алексееваҕа өйдөбүнньүк бэлэхтэр туттарыллыбыттара. Саҥа Дьылга өрөбүлэ суох үлэлээх быыһыыр уонна баһаары кытары охсуһар сулууспаларга фонд болҕомто ууран минньигэс бэлэхтэринэн үөрдүбүтэ.
Бу курдук, дойдуҥ дьоно эн ситиһиигин сыаналаан болҕомто ууруулара хас биирдии спортсмеҥҥа күүһүгэр күүс эбэн, инники кыайыыларга кынаттыыр. Онон спорт сүгүрүйээччилэрэ, улууспутугар спорт сайдыытыгар санааларын ууран туран кыһаллар, ситиһиилээх дьонунан киэн туттар дьон түмсэн үлэлээн-хамсаан эрэллэр.
Фонд тэриллиитин, инники былааннар туһунан Айталинаттан санаатын иһиттибит:
«Фонда тэриллиитэ икки санааттан кэлбитэ. 2027 с. Ньурбаҕа спортивнай оонньуулар буолаллара биллибитин кэннэ салалта, эппиэтинэстээх сирэйдэр эрэ буолбакка, көннөрү олохтоохтор эмиэ бачча историческай түгэҥҥэ тугу эрэ оҥоруохтаахтар диэн санааттан. Иккиһэ, краудфандинг диэн өйдөбүл баар. Бу ньыманан туһанан аҕыйаҕа суох көмө оҥоһуллубута (түгэнинэн туһанан өрүү кыттыһар үтүө санаалаахтарга махтанабын).
Элбэх киһи биир санааҕа киирэн аҕыйахтыы да солкуобайдыы мунньан хамсааһын оҥоруохтарын сөп. Саха АССР төрүттэммитэ 100 сылыгар киирбит санаам 2 сылынан улууспут үбүлүөйдүүр сылыгар олоххо киирбитэ. «Навстречу играм» фонда РФ үтүөлээх тренера, Антоновкаттан киэн туттар биир дойдулааҕым, спорт эйгэтин чулуута Артур Пахомов төрөөбүт күнүгэр төрүттэммитэ икки бүк суолталаах.
Фонда анаан айыллыбыт логотиптаах, биир санаанан салайтаран үлэлиир чилиэннэрдээх. Идеяны бастакыттан өйөөбүттэргэ махтаныахпын баҕарабын: Александра Иванова, Дайана Васильева, Динара Алексеева, Надежда Егорова, Саргылана Егомина, Сардана Павлова, Юлия Кириллова, Надежда Аярова, Олег Конощук, Саргылана Седалищева, Сардаана Камилова, Александра Григорьева, Нюргустана Иванова, Алина Саввинова, Лена Петрова, Эдуард Васильев. Бу соторутааҕыта оонньуулар Дирекциятын салайааччыта Артур Яковлев эмиэ киирбитэ. Биир сылбытын эбии кыттааччылаах Кюнней Буслаевалыын көрүстүбүт.
Ыйга 300 солк. кыттыһабыт, сорох чааһын бэлэхтэргэ ыытабыт, сорох чааһын мунньабыт, барыта бөлөх иһигэр отчуоттана турар. Билигин 22 340 солк. баар. Биир үөрэрим диэн дьон туох да кэтэх санаата суох кыттыһа турарыттан, эрэнэриттэн. Бу фонд биир сүрүн түмүгүнэн 2027 сылга спорка сыһыаннаах мурал оҥоһулларыгар дьулуһабыт. Ньурба спордун чыпчаала Олимпиада мэтээлэ буоларынан боксаҕа сыһыаннаах мурал буоларыгар баҕа баар. Ити баҕа санаа олоххо киирэригэр фонда кэҥиирэ, партнердары кытары үлэлэһии, грантовай күрэхтэргэ кыттыы наада. Фондаҕа киириэн баҕалаахтары барыгытын күүтэбит.
Түмсүүбүтүнэн, биир санаабытынан спорт эйгэтигэр, оонньууларга олохтоохтор кыра да буоллар кылааппытын киллэрэбит диэн санаа миигин кынаттыыр, барыта сатанарыгар эрэли үөскэтэр» — диэн Айталина санаатын үллэһиннэ.
Бу курдук туспа көрүүлээх, дойдуларын сайдыытыгар бэйэлэрин кылааттарын киллэрэр, дьону түмэ тардар талааннаах Айталина Камилова саҕалааһына үтүө түмүктэрдээх буоларыгар баҕа санаабытын тириэрдэбит!
«Норуот күүһэ – көмүөл күүһэ» — диэн мээнэҕэ эппэттэр, норуот күүһүнэн хайаатар да Ньурбабытыгар ыытыллар оонньууттан бу фонда үлэтин түмүгүнэн, өйдөбүнньүк бэлэх оҥоһуллуо диэн бигэ эрэллээхпит.
Спорт управлениетын пресс-киинэ