Балаҕан ыйын 27 күнүгэр Акана нэһилиэгин Айыы Арчытын дьиэтигэр Саха Өрөспүүбүлүкэтин судаарыстыбаннаһын күнүн чэрчитинэн «Сайда тур, Сахам сирэ» тэрээһин буолан ааста.
Ыалдьыттары Саха сирин, төрөөбүт дойду туһунан истиҥ-иһирэх ырыанан туолбут, сабыс саҥа буспут алаадьы сыттаах сырдык балаҕан уруйдуу көрүстэ, сып-сылаас эйгэ кууһан ылла, дорҕоонноох дорообо дуораһыйда, истиҥ илии тутуһуута буолла. «Саха сирэ сайдыы суолунан» кинигэ быыстапката тэнитиллэн көрүстэ.
Тэрээһини Сайыына Горохова, Нарияна Васильева истиҥ ырыалара киэргэттэ, «Акана нэһилиэгэ» тыа сирин түөлбэтин дьаһалтатын баһылыга Ефрем Михайлович Семенов, П. С. Егоров аатынан Акана оскуолатын директора Екатерина Федоровна Мигалкина мустубут дьону Судаарыстыбаннас күнүнэн эҕэрдэлээтилэр, Марыына Петрова аатынан элбэх аналлаах култуура уонна спорт киинин, В. Н. Николаев аатынан библиотека үлэһиттэрэ алгыстаах алаадьынан күндүлээтилэр, бибилэтиэкэр Виктория Лаврентьевна Павлова, уус-уран салайааччы Евдокия Егоровна Саввинова Арчы дьиэтин суолтатын, ис бараанын туһунан билиһиннэрдилэр.
Арчы дьиэтин ис суолтата нэһилиэк дьонун итэҕэли кытта ситимниир, арчылыыр, араҥыччылыыр аналын, итэҕэллээх омук кэскилэ киэҥ буоларын, итэҕэллээх киһи норуотун, дойдутун туһугар олорорун, айарын-тутарын туһунан мустубут оҕолор бигэтик өйдөөн, эбиитин көй салгыҥҥа балаҕан тэлгэһэтигэр норуот таптыыр ырыаһыта, тойуксута Людмила Жиркова, Нарияна Васильева күн оһуохайын оройуттан тутаннар мустубут оҕо, дьон санаалара сааһыланан, туруктара көнөн үөрэн-көтөн тарҕастылар.
Онтон биһиги, култуура үлэһиттэрэ, мэлдьи да буоларын курдук көрөөччүлэрбитигэр махтана, сахалыы алҕыы хааллыбыт.
Евдокия Саввинова