Саха Өрөспүүбүлүкэтин олорор дьиэҕэ, коммунальнай хаhаайыстыбаҕа уонна энергетикэҕэ министиэристибэтин 2024 сыл муус устар 5 күнүнээҕи бирикээһигэр олоҕуран, «СӨ ОДЬьХ» судаарыстыбаннай унитарнай тэрилтэ Ньурбатааҕы филиалын Аканатааҕы учаастагын үлэһиттэрэ икки уоллара анал байыаннай дьайыыга кыттыыны ыла сылдьар Николаев Василий Револьевич уонна Ноева Агафия Романовна чааһынай дьиэлэрин кииннэммит ититии ситимигэр холбуур үлэни түмүктээтилэр.
Сэтинньи 7 күнүгэр дьиэҕэ сылаас бэрилиннэ. Аканатааҕы учаастакка эрдэ сварщиктыы сылдьыбыт, быйыл күһүҥҥэттэн маастарынан анаммыт Федотов Леонид Иванович, бу тэрилтэҕэ өр сылларга сварщигынан үлэлиир Павлов Дмитрий Лаврентьевич бас-көс буолан, үлэлээтилэр.Кэлэктиип 350 погоннай миэтэрэ уһуннаах, Аканаҕа Советскай уулуссатын туорааһыҥҥа үөһэнэн ааһар компенсатордаах саӊа ситими таҥан, Николаевтар Октябрьскай уулуссаҕа турар дьиэлэригэр тиэртилэр.
Хорсун-хоодуот уолаттары иитэн таһаарбыт Василий Револьевич, Агафия Романовна дьиэлэригэр сылаас ситим киирэн, үөрүүлэрэ үрдээтэ. Маннык өйөбүл миэрэлэрин кэҥэтэ турар СӨ Ил Дарханыгар Айсен Сергеевичка, олох-дьаһах хаһаайыстыбатын министиэристибэтигэр, Ньурбатааҕы филиал салалтатыгар, Аканатааҕы учаастак кэлэктиибигэр, Ньурба улууһун дьаһалтатыгар, Үлэ уонна социальнай сайдыы министиэристибэтигэр, Ньурбатааҕы социальнай харалта управлениетыгар дириӊ махталларын тиэрдэллэр.
Акана нэһилиэгин пресс-киинэ