Хаҥалас нэһилиэгин «Алаас Хотуна» эбээлэр түмсүүлэрэ (сал.Адамова А.С.) нэһилиэк общественнай олоҕун биир сүрүн хамсатааччылара буолан, үгүс тэрээһиннэри, көрсүһүүлэри тэрийиигэ биир тутаах дьоммут. Ааһан эрэр алтынньы ый Эбээлэргэ өйгө-сүрэххэ хаалар элбэх алыптаах күннэрдээх буолла.
Бу түмсүү биир уратытынан, СӨ эрэгийиэнин «Дууһабытын эдэрбит («Молоды душой», салайааччы биир дойдулаахпыт Валентина Васильева-Сартаева) үрүҥ көмүс волонтердарынан буолан, өрөспүүбүлүкэ, ону ааһан Арассыыйа үрүҥ көмүс волонтёрдара ыытар элбэх үлэлэригэр, бырайыактарыгар кыттыылара буолар.
Алтынньы ыйга
Учуутал күнүн көрсө ыытыллыбыт «Школа зажигает звезды» күрэх тэрээһиҥҥэ уран тарбахтаах эбээбит Раиса Семёновна эдэр кэскиллээх омук тылын учууталыгар Александра Аркадьевнаҕа олус кырасыабай хаппар тикпитин бэлэхтээн үөртүбүт, бириискэ спонсор быһыытынан эмиэ кыттыстыбыт.
Алтынньы 4 күнүгэр эбээлэр оҕо уһуйааныгар нуучча биллэр остуоруйатын «Эриэппэни» оонньоон көрдөрөн, кырачааннары үөртүлэр.
Алтынньы 7 күнүгэр СӨ үтүөлээх артыыһа Саина тренинг курсугар дьарыктанан, сөпкө тыынарга медитацияҕа дьарык ылан, ыллаан, үҥкүүлээн да ыллылар.
Эбээлэр Ийэ күнүгэр кыһыҥҥы айылҕаҕа тахсан ыраас салгынынан тыынан, онтуларын үйэтитэр сыаллаах учуутал кыргыттар хаартыскаҕа түһэрэн үөртүлэр. Салгыы кылаас салайааччыта Туяра Анатольевна ыҥырыытынан Эбээ, эһээ күнүгэр анаммыт тэрээһиҥҥэ кыттыһан, «Көрдөөх стартка», ол быыһыгар үрүҥ көмүс волонтёр Павлова Р.М. оҕолору собо ыраастыырга үөрэттэ.
Быйыл Арассыыйаҕа Дьиэ кэргэн, Сахабыт сиригэр Оҕо саас сылынан ыытыллыбыт оройуоннааҕы «Дьиэ кэргэн — биир сомоҕо» интеллектуальнай күрэххэ үс эбээбит кыттыһан билиилэрин тургуттулар.
Алтынньы 29 күнүгэр Улуу Кыайыы 80 сылын көрсө ыытыллар Кыайыы уотун эстафетатыгар ыаллыы Үөдэй нэһилиэгин көрсөр тэрээһиҥҥэ эмиэ актыыбынайдык кыттан, көрөөччүлэргэ норуот таптыыр «Хайыһар» ырыатын бэлэхтээтилэр. Интерактивнай күрэххэ Адамова А.С., Герасимова Р.С. иннилэрин кимиэхэ да биэрбэтилэр.
Маны сэргэ квартал аайы «Своих не бросаем» фондаҕа кыттыһан, Хаҥалас нэһилиэгин үрүҥ көмүс волонтёрдара харчыннан сэмэй көмө, байыастарга анаан харысхал тигэн ыыталлар.
Дьэ ити курдук олох үөһүгэр сылдьар эбээлэр барахсаттар хас биирдии үүнэр күҥҥэ туох эмэ туһалааҕы, үйэлээҕи ыччат дьоммутугар хааллардарбыт диэн баҕа санаалаах олороллор, айаллар. Манна өссө эбэн кэбиһиҥ сиэн оҕо, сүөһү ас көрүүтүн.
Мария Николаева,
Хаҥалас