? Бүгүн Россияҕа атыы-эргиэн үлэһиттэрин күнэ. «Бу эйгэҕэ хаалабын диэн санаа баар», — диэн үллэстэр «Смак» маҕаһыын товароведа Мария Семенова.
Ньурбаҕа маҕаһыын аайы кэриэтэ ис киирбэх эдэр атыыһыттары киһи өйдөөн, сөбүлээн көрөр. Уопсайынан даҕаны күннээҕи олохпутугар атыыһыттар улахан оруоллаахтар.
Ону таһынан көстүбэт фронт үлэһиттэрэ бааллар. Мария бэйэтэ технология учуутала идэлээх. Төрөөбүт дойдутугар Марха орто оскуолатыгар үлэлии сылдьыбыт. Ньурбаҕа көһөн киирэн вакансиянан «Смак» маҕаһыыҥҥа тиийбит.
26 саастаах учуутал кыыс үс сыл атыыһыт-кассирынан үлэлээбит. Үтүө үлэһити бэлиэтии көрөн, былырыыҥҥыттан товаровед буолбут, саҥа идэҕэ сыыйа үөрэммит. Табаар киллэрэр, сайаапкалыыр, түөрт маҕаһыынынан тарҕатар, атыылаһааччы наадатын анализтаан булар-талар, үлэни бэрэбиэркэлиир.
Кюар-код, 20% НДС киирбитэ ыарахаттардаах курдугун да иһин, «Хамнас үчүгэй, коллектив үчүгэй, хотунум үчүгэй» — Мария доргуччу, эрэллээхтик этэр. Киниэхэ биэс күн үлэ, икки күн сынньалаҥ. «Смак» бары маҕаһыыннарыгар эргийэ сылдьан үлэлиир. Холобур, бүгүн Комсомольскай уулуссаҕа турар кэмигэр көрсөн кэпсэттибит.
«Смак» маҕаһыын 23 үлэһиттээх. Итинтэн атыыһыта — 14. Эдэрдэр аҕыйаҕа суохтар. Идэлээх күннэринэн эҕэрдэлиибит, үлэттэн дуоһуйууну баҕарабыт!
Улуустааҕы ыччат управлениета