Чуукаар, Малдьаҕар, Мэҥэдьэк, Бордоҥ нэһилиэктэрин кэннэ Алексей Иннокентьев тыа хаһаайыстыбатын боппуруостарыгар солбуйааччытынаан Леонид Ушкановтыын, баай-дуол, сир сыһыаннаһыыларын комитетын сир отделын салайааччытынаан Евдокия Васильевалыын салгыы үлэлээтилэр, аһаҕас кэпсэтиилэри ыыттылар.
Марха нэһилиэгэ. Тыа хаһаайыстыбатын тула элбэх кэпсэтии барда. Уматык буоллун, оттуур ходуһа инвентаризацията, үүт туттарыыта буоллун. Өҥөлдьөҕө кыһалҕалаах кэмҥэ улуус дьаһалтатын үлэтин, бүттүүн улуус туругун кэпсэтистилэр.
Акана, Хаҥалас, Түмүк нэһилиэктэрэ. Итинник хабааннаах кэпсэтиилэргэ үлэни анализтааһыҥҥа, олохтоохтор этиниилэрин инники ыытыллар үлэҕэ учуоттуурга болҕомто уурулунна. Бары киирбит ыйытыктарга толору хоруйдар бэрилиннилэр. Маарга баһылык спорт министиэристибэтин бырайыагынан олоххо киирэ турар ГТО площадкатын көрдө-иһиттэ, оскуола өрөмүөнүн хаамыытын билистэ, төннөн иһэн Чаппандаҕа тутулла турар спортзал объегар сырытта.
Күндээдэ, Сүлэ. И.В. Николаев – Бытык Уйбаан аатынан «Күндээдэ» агрофирма туруга Күндээдэ нэһилиэнньэтин долгутар. Улуус, нэһилиэк дьаһалталарын, тэрилтэ салалтатын түмсүүлээх үлэлэрэ кыһалҕалаах кэми туоруурга төһүү күүс буолуохтаах. Сүлэҕэ бары нэһилиэктэргэ курдук Оонньууларга бэлэмнэнии үлэтин хаамыытын, сыал-сорук тула кэпсэтии барда. Оҕунан ытыы көрүҥэр үрдүк ситиһиилэри бэлиэтээтилэр. «Сиибиктэ АС» кээпэрэтиип саҥа тутулла турар сыаҕын көрдүлэр.
Хорула, Таркаайы. Манна баһылыгы, ДСХ салайааччытын кытта КИО председателын солбуйааччыта Владислав Васильев сылдьыста. Оонньуулар тула кэпсэтиилэр аастылар. Кыһалҕаларга, ыйытыктарга улахан болҕомто уурулунна. Улууска БПЛА көмөтүнэн кадастровай үлэлэр ыытыллаары тураллара этилиннэ. Улуус баһылыга Хорула нэһилиэгин демография үрдүк көрдөрүүлэрин бэлиэтээтэ. Бу хайысха республикаҕа эрэ буолбакка, бүтүн дойду үрдүнэн биир сүрүн.
Октябрьскай нэһилиэк. Ньурба куорат кэннэ иккис улахан киин буоларынан Оонньуулар тула элбэх кэпсэтии буолла, тэрээһиннэргэ нэһилиэнньэ көхтөөхтүк кыттара күүтүллэр. Биир улахан тутуу, единоборство зала, Антоновкаҕа бара турар. Социальнай-экономическай, тыа хаһаайыстыбатын боппуруостара, кыһалҕалар ырытылыннылар.
Ньурбачаан, Дьиикимдэ. Бу нэһилиэктэргэ муниципальнай суоллар туруктара, тыа хаһаайыстыбата, сир-уот туттуллуута кэпсэтиигэ баар. Ньурбачаан Оонньууларга бэлэмнэнэр, стендовай ытыыга аналлаах объект тутуллар. «Мотивы Ньырбакаан» этномузыка фестивалын бырайыага дойду Президенин 698 тыһ. гранын сүүйбүтэ улахан үөрүү.
Үөдэй, Дьаархан, Чаппанда. Нэһилиэк олоҕун-дьаһаҕын тула кэпсэтиилэр, ыйытыктарга хоруйдааһын буолла. Аһаҕас кэпсэтиилэргэ толору информация бэрилиннэ. Оонньуулар тула кэпсэтии манна эмиэ биир актуальнай тиэмэ. Дьаарханнааҕы «Дьулуур» ПСК молокозаводугар, Чаппандаҕа модульнай спортзал, врачебнай амбулатория тутууларыгар, Антоновка Куочайыгар сайылыкка үлэни билсэн аастылар.
От ыйын 10 күнүгэр саҕаламмыт көрсүһүүлэр 21-кэ түмүктэннилэр. Улуус баһылыга Алексей Иннокентьев маннык сырыыларга олохтоохтору тус көрсөр, кыһалҕаларын билсэр кыахтанарын бэлиэтиир, көрсүһүүлэргэ сылдьыбыт дьоҥҥо-сэргэҕэ махталын биллэрэр.
Ньурба улууһун дьаһалтатын пресс-сулууспата
Сүрүн хаартыскаҕа: Марха нэһилиэгэр көрсүһүү.