Ахсынньы аам-даам тымныытыгар, бэҕэһээ, Ньурбатааҕы көһө сылдьар драматическай тыйаатырга «Бары бииргэ кыайыыга!» диэн ааттаах Анал байыаннай дьайыы кыттыылаахтарыгар уонна кинилэр дьиэ кэргэннэригэр аналлаах Мииринэй, Бүлүү бөлөх улуустара кыттыылаах волонтердар форумнара буолла.
Дьокуускай куораттан Саллааттар уонна мотуруостар төрөппүттэрин өрөспүүбүлүкэтээҕи кэмитиэтин салайааччыта Мария Емельянова, Донбаһы өйүүр Хотугулуу-Илиҥҥи пуонда салайааччыта Георгий Куркутов, СӨ ыччат дьыалатын уонна социальнай коммуникация миниистирэ, Анал байыаннай дьайыы кыттыылааҕа Петр Шамаев, нэһилиэк баһылыктара форумҥа кыттыыны ыллылар.
Форуму улуус баһылыгын солбуйааччыта Василий Семенов аста.
Мииринэй, Бүлүү, Үөһээ Бүлүү уонна Ньурба волонтердара илиилэрин сылааһын иҥэрэн тикпит үлэлэрэ, таҥастара-саптара, харысхал сиэккэлэрэ уо.д. а тэриллэрэ бэйэ бэйэлэригэр майгыннаһаллар эрээри, Мииринэй улууһун волонтердара харысхал сиэккэҕэ өрүллүбүт накидкаларын, бааһырбыттарга аналлаах таҥастарын дьон уратытык көрдө. Волонтердар быыстапкаҕа сылдьан бэйэ-бэйэлэрин кытары санаа атастастылар.
Эбиэт кэннэ пресс-конференция кэнниттэн #МЫВМЕСТЕ аһаҕас диалог ыытылынна. Форум кыттыылаахтара волонтердар, Анал байыаннай дьайыыга сылдьар биир дойдулаахтарбытыттан оҕотун сүтэрбит ийэ Донбаһы өйүүр Хотугулуу-Илиҥҥи пуонда салайааччытыгар Георгий Куркутовка махталын биллэрдэ, дьиэ кэргэннэр ааттарыттан сүрэхтэригэр тууйулла сылдьар санааларын үллэһиннилэр, байыаннай дьайыы кыттыылаахтарыгар сыһыаннаах сокуон өттүгэр боппуруостары биэрдилэр, тутатына боппуруостарга Георгий Куркутов, Петр Шамаев эппиэттээтилэр.
СӨ ыччат дьыалатын уонна социальнай коммуникация миниистиэристибэ, Донбаһы өйүүр Хотугулуу-Илиҥҥи пуонда уонна улуустааҕы дьаһалта, аатыттан эҕэрдэ, махтал суруктары, «Бочуоттаах волонтер» түөскэ кэтэр, оройуон Сэбиэтин, Ил Түмэн аатыттан бочуотунай грамоталары туттартаатылар.
Тэрээһин кыттыылаахтара «Бары бииргэ кыайыыга!» диэн этиинэн түмүктээтилэр, түмүккэ уопсай хаартыскаҕа түһүү буолла.
Сиһилии «Ньурба» хаһыат кэлэр нүөмэригэр тахсыаҕа.
Антонина Семёнова