Халлааммыт сылыйан халтараан буолан, массыына-суол быһылаана тахсара элбээтэ. Ол туһунан туһааннаах сулууспалар иһитиннэриилэрэ туоһулуур.
Бэҕэһээ 16 ч. 24 мүн. төбөтүгэр эчэйиилээх Дьаархан олохтооҕо М. балыыһаҕа көрдөрбүтүн туһунан иһитиннэрии киирбитэ. Кэлин биллибитинэн, сарсыарда 10 ч. саҕана «Бүлүү» федеральнай суолга гр. Н. «Тойота» мааркалаах массыынанан айаннаан иһэн уруулун кыайан салайбакка, массыыната күбүөккэ түспүт. ДТП түгэнигэр ирдэнэр быраабыланы тутуспакка, суоппар бэйэтэ күбүөттэн массыынатын таһааран Дьаархаҥҥа айаннаан тиийбит. Бу түмүгэр Дьаархан олохтооҕо М. төбөтүн эчэтэн улуустааҕы киин балыыһаҕа травматологияҕа кэлэн көрдөрбүт. Онон суоппар Суол быраабылатын куруубайдык кэспит.
Эмиэ бэҕэһээ 16 ч. 26 мүн. Ньурба куоракка «Тойота-Прадо» массыыналаах дьахтар Христофор Максимов уул. айаннаан иһэн, сүрүн уулуссанан (Комсомольскай уул.) айаннаан иһэр «УАЗ-Патриот» массыынаны аһардыбакка тиийэн кэтиллибитэ. Күүстээх охсуу түмүгэр УАЗ массыына күбүөккэ түһэн хаалбыта, суоппар удамыр уонна пассажир элбэх эчэйиилээх балыыһаҕа тиэрдиллибиттэрэ. Пассажир мэйиитэ доргуйбут, диагнозтара: «закрытая черепно-мозговая травма, закрытый перелом внутренней стенки правой глазницы, рвано скальпированная рана правой подглазничной области, ушиб мягких тканей области грудины, закрытый импрессионный перелом латериального мыщелка левой большой берцовой кости». Муҥар, кини массыынаҕа курдаммакка олорбут. ДТП буолбут миэстэтигэр суол бэлиэлэрэ баар, онон ким буруйдааҕа мөккүөрэ суох: «Прадо» суоппара Суол быраабылатын кэспит.
Халтараан кэмигэр суолунан сылдьааччылары сэрэхтээхтик сылдьаргытыгар уонна Суол быраабылатын халбаҥнаабакка тутуһаргытыгар ыҥырабыт! Мээнэҕэ эппэттэр: «Суол быраабылата хаанынан суруллубут», — диэн. Суол быраабылатын тутуһуу – олохпут мүччүрүйбэт ирдэбилэ.
Улуус дьаһалтатын пресс-сулууспата