Бүгүн – Бөтүрүөп күнэ. «Сайыҥҥы биир күн дьылы аһатар» диэн бэргэн өс хоһооно баар. Сүөһүлээх-сылгылаах дьоҥҥо улахан эппиэттээх кэм саҕаланна.
Оттон Күндээдэҕэ Семен Прокопьевич уонна Антонина Николаевна Степановтар дьиэ кэргэттэрэ сүөһүлэрин уонна сылгыларын кыстатар отторун номнуо булуннулар. Бүгүн ходуһаҕа үлэлэрин түмүктээтилэр.
Сыллата маннык эрдэ оттоон бүтэр идэлээхтэр. Быйыл өссө эрдэлээтилэр. Сайын баччатыгар маннык эрдэ оттон бүппүт киһи баарын үгүс дьон, бука, саҥа истэрэ буолуо. Онон Степановтар быйыл Ньурба улууһугар бастакынан үтүө холобуру көрдөрдүлэр.
Кинилэр хаһаайыстыбалара мыыныыта суох — 19 ынах сүөһүлээхтэр, ол иһигэр 5 ынах, итиэннэ сылгылаахтар.
«Бэйэм ИП быһыытынан тэринэн үлэлиибин, чопчулаан эттэхпинэ — «самозанятай» диэммин, — диир Семен Прокопьевич. — От ыйын 6 к. окко киирбиппит, Күндээдэттэн 20-чэ км тэйиччи баар Дорокуга уонна Уһун Маныырга оттуубут.
Биһиги тиэхиньикэбит — икки «Синтай» тыраахтыр, УАЗ уонна омук легковай массыыната. Оттуур сирбит ыраах курдугун аанньа, суола үчүгэй. Уолбунуун «Синтай» тыраахтырдарынан оҕустардыбыт. Онтон киһиэхэ кэпсэтэн рулоннаттыбыт. 350 кг ыйааһыннааҕынан 111 рулону ыллыбыт, биһиэхэ сөп буолар.
Быйыл сирбит уута элбэх. Онон ууга барбыт үөс өттүн мунньан, атырдьаҕынан тарҕатан куурдан баран, иккистээн мустубут. Биир үксүн ол иһин оту ыллыбыт. Аны аһыыка буолунай эбит. Рулоннаах оппутун күрүөҕэ уктубут, сороҕун хотоммут таһыгар кыбыыга аҕалыам. Онон сүөһүбүтүгэр-сылгыбытыгар сөп буолар оппутун хааччынныбыт.
Былырыын «АОМОН» кытай тыраахтырын ылбытым. Куннаах, 350-наах рулуону киһилээбэт, итинэн күрүөҕэ таһабыт.
Сылын аайы маннык эрдэ оттуубут. Былырыын 11 тонна үүтү туттарбытым, быйыл 8 туоннаҕа эрэ квота биэрдилэр. Ол былааным сотору туолар. Тоҕо кээмэйдииллэрэ буолла, саатар эрэ ыан туттар диэхтэрин.
Хортуоппуй, оҕурсуу, помидор уонна сибэкки олордобут. Оҕуруот аһын сөп буоларынан хаһаанабыт. Билигин иллэҥсийэн, аны сир аһыгар киириэхпит. Кылгас сайыммыт барахсан быйаҥыттан мэлдьи бойумнук тииһинэбит. Сайын үчүгэйин, быйаҥын билэр буоллахпыт».
Геннадий АНТОНОВ