Ахсынньы 7 күнүгэр сарсыардаттан Акана нэһилиэгин фельдшерскай-акушерскай пуун тэриллибитэ 75 сылын бэлиэтиир уонна бу тэрилтэҕэ 40-тан тахса сыл таһаарыылаахтык үлэлээбит биэлсэр Торохова Евдокия Артамоновна аатын иҥэрии тэрээһинэ ыытылынна.
Үөрүүлээх чааһын кэнниттэн балыыһа дьиэтигэр экскурсия, саҥа истиэндэни билсии, күндү киһибит аата иҥэриллибитин туоһулуур балыыһа вывескатын арыйыы, алгыстаныы буолла.
Алгыстаныы, арчыланыы сиэрин-туомун толордо Алиса Михайловна Иннокентьева.
Мустубут дьон мааны астаах сандалы тула олорон уруккуну-хойуккуну кэпсэтэн, оонньоон-көрүлээн тарҕастылар. Икки күннээх 3 тэрилтэ үбүлүөйэ элбэх ыалдьыттаах, сэргэх тэрээһиннэрдээх, элбэх наҕараадалардаах, мустубут дьону үөрдэр, долгутар түгэннэрдээх, элбэх сыллар кэннилэриттэн истиҥ көрсүһүүлэрдээх сып-сылаас иэйиилээх дууһа ахтылҕанын уоскутар абылаҥнаах, оҕо сааһы, эдэр сааһы төннөрөр эйгэни үөскэтэн түмүктэннэ.
Бу көрсүһүүлэр кэннилэриттэн бэрт элбэх санаалар, толкуйдар киирдилэр. Маннык тэрилтэлэр үбүлүөйдэрэ үлэлээн ааспыт дьону чиэстииргэ, тэрилтэ өр сыллаах үлэтин историятын сөргүтэргэ олус наадалаахтар эбит. Хас биирдии нэһилиэк дьылҕатын нэһилиэк олохтоохторо уһаналлар. Бары ыалдьыттарбытын оҕо курдук сайыһа, алҕыы хааллыбыт.
Дьоллоох, доруобай буолуҥ, төрөөбүт-үөскээбит түөлбэҕитин ахта-саныы сылдьыҥ, оҕолоргут, сиэннэргит ситиһиилээх үтүө дьон буоллуннар, өрүү маннык үөрүүлээх көрсүһэр түгэннэр үүнэ, үксүү турдуннар!
Евдокия Саввинова