Биллиилээх дуобатчыт, үлэ уонна спорт бэтэрээнэ Н.Н.Саввиновы 85 сааһынан эҕэрдэлээтилэр

 

Бүгүн Дьокуускайга олорор биир дойдулаахпыт Николай Николаевич Саввинов 85 сааһынан чиэстээтилэр. Ил Түмэн сис кэмитиэтин бэрэссэдээтэлэ Георгий Балакшин, Дьокуускайга Ньурба улууһун бэрэстэбиитэлэ Прокопий Чымыров, СӨ физическэй култууратын уонна маасабай спордун Салалтатын салайааччыта Роман Оконешников, СӨ дуоаб Федерациятын вице-бэрэсидьиэнэ Иван Токусаров юбиляры истиҥник эҕэрдэлээтилэр уонна үтүөнү баҕарыыларын тиэртилэр. Бу бэлиэ түгэҥҥэ сөп түбэһиннэрэн, Н.Н.Саввинов бирииһигэр бэтэрээннэргэ 25-с төгүлүн дуобат күрэхтэһиитэ ыытылла турар, манна 100-тэн тахса киһи кыттар.

Николай Саввинов 1963 с. Ленинградтааҕы судаарыстыбаннай университет математико-механическай факультетын бүтэриэҕиттэн, өр сыллар тухары СГУ-га, онтон СӨ Статистическай управлениетыгар, СӨ Пенсионнай сулууспатын департаменыгар салайар дуоһунастарга ситиһиилээхтик үлэлээбитэ. Кини улахан күрэхтэһиилэргэ дойдутун чиэһин ситиһиилээхтик көмүскээбит күүстээх дуобатчыт, ССРС спордун маастарын, дуобат оонньуутун тэрийээччи уонна пропагандалааччы быһыытынан биллэр. Дуобакка өрөспүүбүлүкэ 13 төгүллээх чөмпүйүөнэ, РСФСР чөмпүйээнэтин боруонса призера, ССРС чөмпүйээнэтин финалиһа, бэтэрээннэргэ Европа чөмпүйээнэтин боруонса призера, дуобат спордун аан дойдутааҕы Федерациятын маастара уонна элбэх дуобатчыттары бэлэмнээбит тренер, дуобат спордун салайааччыта уонна дуобат туһунан элбэх кинигэ, брошюра ааптара. Кини уһун кэмнээх уонна айымньылаах үлэтэ сыаналанан, «Гражданскай килбиэн» бэлиэнэн наҕараадаламмыта, Арассыыйа спордун бэтэрээнин, ХХ үйэҕэ СӨ спордун лауреатын, СӨ норуотун хаһаайыстыбатын үтүөлээх үлэһитин аатын чиэстээхтик сүгэр. Ытыктыыр биир дойдулаахпытыгар кытаанах доруобуйаны, уйгулаах уһун олоҕу баҕарабыт!

Генналдий АНТОНОВ