- Ньурбаҕа бу күннэргэ хомуур үлэтэ үгэннээн бара турар. “Ньурбатааҕы сүөһү аһылыгын оҥорор хампаанньа” Кураан бааһынатыгар 318 гектарга ыспыт эбиэһин хомуйа сылдьар. Быйыл үүнүүтэ үчүгэй, халлаан даҕаны туран биэрэн үлэ күргүөмнээхтик барар. Бааһынаҕа 10 киһи, комбайн, икки беларус тыраахтыр үлэлии сылдьаллар.
“Ньурбатааҕы сүөһү аһылыгын оҥорор хампаанньа” АУо салайааччыта Александр Илистяров: “Бааһына сорох өттө өссө даҕаны ситэ илик. Зяблевай вспашка оҥорбутум, онтум сииги тутан уонча күн хойутаан киирбиппит. Урукку дьылларга алтынньы 5 күнүн диэки бүтэр этибит, билигин 10-ка бүтүөхпүт диэн былаанныыбыт, хата күһүммүт уһуох курдук. Бүҥҥү күн туругунан 30-ча туоннаны хомуйдубут, үүнүүтэ отой үчүгэй.
Баһыйар үгүһүн оройуоҥҥа биэрэбит, сороҕун ыаллыы улуустар ылаллар. Биһиги химияны туттубаппыт, хаачыстыбата үчүгэй буолан былдьаһык. Кэлэр сылтан зерновой хаһаайыстыбалар миигиттэн ылар түгэннэригэр возмещение бэриллэрин курдук тыа хаһаайыстыбатын министиэристибэтин кытта үлэлэһэ сылдьабыт. Холобура, Новосибирск, Тюмень куораттартан дьон эбиэс ыллахтарына возмещение оҥороллор, онтон биһигиттэн ылар буоллахтарына — суох. Маны итини сыыһа дии саныыбын. Ирдэбиллэри тутуһабыт, аппробация ааһабыт, онон биир тэҥ сыһыан олохтонуохтаах диибин.
Элбэх сыллаах оту ыһан быйыл 7 туоннаны хомуйдубут. Технологиятын барытын тутуһан ыһабыт. Сорох дьон сиэмэтин ылан баран үүммэт дииллэр, биллэн турар, мээнэ ылан ыһан кэбистэххэ тэппэт. Быйыл супер-элита Туймаада диэн олохтоох бурдук суордун боруобалаан олордон көрдүбүт. 2 туоннаны ыһан баран 10-тан тахсаны хомуйдубут. Аны билигин барытын ыраастаан баран, эһиил ол 10 туоннабытын ыһан боруобалыахпыт. Кэҥээн иһиэхтээхпит, бурдугу ким баҕарар атыылаһыан сөп”.
Тэрилтэ АГАТУ-ну кытары сөбүлэҥнээхтэр, ол иитинэн быйыл эмиэ 5 устудьуон хомуурга үлэлии кэлбит. Бу курдук үлэ бэһис сылын тэриллэр.
Мария Кириллина, дириэктэри солбуйааччы: “Быйыл биһиэхэ 5 АГАТУ устудьуона кэлэн бурдук ыраастааһыныгар үлэлии сылдьаллар. Бары уолаттар, идэлэринэн агроинженердар. 1 ый устата үлэлиэхтэрэ, быйыл төрдүс сылын бу курдук кэлэн уопут ылаллар, сири-дойдуну көрөллөр, үлэ хаамыытын харахтарынан көрөн, илиилэринэн тутан-хабан билсэллэр. Производственнай практика быһыытынан сылдьаллар, эбии хамнас аахсаллар. Олорор сирдэрин, астарын барытын тэрилтэбит хааччыйар”.
Оройуоҥҥа тэриллэн үлэлии сылдьар тэрилтэлэр биир холдинг курдук бары бииргэ үлэлииллэр. Бааһыналары мэнэйдэһэн, техникаларын уларсыһан, бэйэ-бэйэни өйөһөн. Бу курдук бииргэ тутуһан сырыттахпытына үлэ үчүгэй көрдөрүүлээх буолар, — диэн Александр Иванович этэр.
Лена Петрова
Быйылгы үүнүү үчүгэй
