Кулун тутар 12 күнүгэр Киин бибилэтиэкэ дьиэтигэр Ньурба улууһун бастакы баһылыга, СӨ норуотун хаһаайыстыбатын үтүөлээх үлэһитэ Валентин Иванович Никифоров туһунан «Чаҕылхай олох өлбөөдүйбэт суола» диэн кинигэ төрөөбүт сиригэр-уотугар сүрэхтэниитэ буолла.
Бу сыл тохсунньу 16 күнүгэр Дьокуускайга Национальнай бибилэтиэкэ устуоруйатын саалатыгар куоракка олорор биир дойдулаахтарбытыгар, үөлээннээхтэригэр билиһиннэрбиттэрэ.
Кинигэҕэ кэргэнэ Александра Николаевна Николаева, уола Иван Валентинович Никифоров, Борис Борисович Борисов үлэлээтилэр. Барыта 200 ахсаанынан ааҕааччы киэҥ араҥатыгар ананан бэчээттэннэ.
Тэрээһиҥҥэ Валентин Иванович кэргэнэ Александра Николаевна, бииргэ төрөөбүт балта Елизавета Ивановна, кыыһа, аймахтара, кэллиэгэлэрэ, үөлээннээхтэрэ кыттыыны ыллылар. Валентин Ивановиһы кытта үлэлээбит сылларын, кэллиэгэ, салайааччы, аа, эһээ быһыытынан дьиҥ киһи киһитэ, дьон холобур оҥостор салайааччыта буоларын, улуус сайдыытыгар киллэрсибит сүҥкэн кылаатын туһунан элбэх үтүө тыллар этилиннилэр.
Өссө даҕаны инникитин Валентин Иванович сырдык аата үйэтитиллэригэр элбэх үлэ барыан наада диэн тоһоҕолоон бэлиэтээтилэр.
Тэрээһин туһунан сиһилии хаһыат кэлэр нүөмэригэр ааҕаарыҥ.
Лена Петрова