Чуукаар нэһилиэгэ ыйын ахсын нэһилиэккэ буолбут сонуну быыстала суох ыытар. Бу сырыыга ыыппыт сонуннарын ааҕааччыларга тиэрдэбит.
От ыйын 28 күнүгэр, эбэ уута бара турарын тохтотор суһал субуотунньук үлэтэ ыытылынна.
Олохтоох дьаһалтаҕа, от ыйын 7-12 күннэригэр Таатта улууһугар ыытыллыбыт XXII Манчаары оонньууларыгар Ньурба улууһун хамаандатыгар киирэн Чуукаартан кыттыбыт, кэккэ ситиһиилэрдээх Афанасьев Валентины уонна Васильев Эльманы чиэстээһин буолла. Афанасьев Валентин быйылгы Дыгын оонньууларыгар бастакытын кыттан 10 иһигэр эрэллээхтик киирдэ. Уолаттары Аҕа баһылык Артур Юрьевич истиҥник эҕэрдэлээн туран, үөрүүлээх быһыыга-майгыга биирдиилэригэр Махтал суруктары, олохтоох урбаанньыттарбыт Егоров В.С. 15-тии тыһ. солк., Афанасьева Н.М. 10-уу тыһ. солк. суумалаах сэртипикээттэри, Федоров Е.П. анал спортивнай көстүүмнэргэ сэртипикээттэрин туттардылар.
Чуукаарга нэһилиэгин тупсаран оҥорууга оҕоҕо аналлаах мини-паарка оҥоруутугар сирин тэҥнээһин үлэтэ барар.
Ростелеком үлэһиттэрэ Куоначчааны туоруур кабеллэр ууга түһэ сыталларын тардан көннөрөр үлэни ыыттылар
Оскуола-уһуйаан сарайын матырыйааллара кэллилэр. Эргэ оскуоланы көтүрэр үлэтин «Сэттэ» тутуу хампаанньата ыытар.
Чуукаар — Киирэп хайысханан айан суолун ХЭО ПКФ «Агроснаб» тэрилтэтэ (салайааччы Протопопов А.Н.) оҥоро сылдьар.
«Чуукаар нэһилиэгэ» ТСТ дьаһалтатын пресс-сулууспата