Дьаарханнааҕы 414 №-дээх учаастактааҕы быыбар хамыыһыйатыгар 5 киһи үлэлиир. Дойдубар тахса сылдьан, УИК-ка таарыйан быыбар хаамыытын билистим.
УИК бэрэссэдээтэлэ Айталина Семеновна Мандарова кэпсииринэн, быыбардааччылар испииһэктэригэр 178 киһи баар. 118 киһи быыбардаабыт, ол иһигэр 7 киһи доруобуйатын туругунан дьиэтигэр куоластаабыт. Онон нэһилиэк олохтоохторун быыбарга кыттыылара 69,29%-ҥа тиийдэ.
«Сорох дьоммут сарсын быыбардыы кэлээри сылдьаллар. Биһиги сарсын эмиэ сорох кырдьаҕастарбытыгар дьиэлэригэр сылдьан куоластатыахпыт», — диир Айталина Мандарова.
Бэҕэһээҥи түмүгүнэн дьаархаттар быыбарга көхтөөх кыттыыларынан Үөдэй уонна Накыын баахтабай бөһүөлэгин кэнниттэн үһүс миэстэҕэ тахсыбыттара. Онон бу тэтимнэрин ыһыктыбакка өссө да кыттар санаалаахтар.
Геннадий Антонов