Ахсынньы 24 күнүгэр Ф.Г.Сафронов аатынан кииннэммит бибилэтиэкэ Арассыыйаҕа — Дьиэ кэргэн, СӨ — Оҕо саас сылларын түмүктүүр «Дьиэ кэргэн — биир сомоҕо» күрэҕи тэрийэн ыытта. Маннык хабааннаах тэрээһини саас кулун тутар ыйга саха суруйааччыларыгар аналлаах өй күрэһин оонньууну «Чолбон» сурунаал тэрийэн ыыппыта. Онно кыттыбыттар бүгүҥҥү күрэххэ кытыннылар.
Күрэххэ Ньурба оройуонун 18 нэһилиэгиттэн 18 дьиэ кэргэн кыттаннар нэһилиэктэрин чиэһин көмүскээтилэр. Бырайыак ааптардарынан Мэҥэдьэктээҕи 11 №-дээх бибилэтиэкэ филиалын үлэһитэ Матрена Габышева, Октябрьскайдааҕы 3 №-дээх бибилэтиэкэ филиалын үлэһиттэрэ Людмила Ефремова, Раиса Сухаринова буолаллар.
Бырайыак чэрчитинэн уопсайа 90 ыалы хабан, дьиэ кэргэни сомоҕолуур, сахалыы ааҕар, уус-уран литератураны таптыыр дьиэ кэргэттэри түмэр сыаллаах тэриллэн ыытылынна.
Дьүүллүүр сүбэҕэ оройуон дьаһалтатыттан опека уонна попечительство салаатын салайааччыта Валентина Семеновна Халанникова, улуус дьаһалтатын социальнай уонна дьиэ кэргэн бэлиитикэтин сүрүннүүр исписэлииһэ Ольга Валерьевна Андреева, Ньурбатааҕы Ф.Г.Сафронов аатынан кииннэммит бибилэтиэкэ салайааччытын солбуйааччыта Елена Анатольевна Саввинова, улуустааҕы ыччат дьыалатын имиджевай бэлиитикэтин салаатын бырайыактыыр отдел салайааччыта Елена Валентиновна Дьячковская сыанабыл биэрдилэр.
Оҕолорго күрэх ыытыы түмүгүнэн Антоновка оскуолатын 10 кылааһын үөрэнээччитэ Сэмира Николаева кыайыылаах аатын ылла.
Күрэх кэмигэр Маалыкайтан Ушканова Ольга Николаевна, Быһыттаах нэһилиэгиттэн Саввинова Нюргуяна Александровна, Хаҥаластан Антонова Елизавета Петровна, Дьаархантан Фёдорова Тамара Иннокентьевна, Антоновкаттан Тимофеев Владимир Михайлович дьиэ кэргэннэригэр Ньурба оройуонун социальнай-экономическай сайдыытыгар кылааттарын иһин Махтал суруктары улуус дьаһалтатын социальнай уонна дьиэ кэргэн бэлиитикэтин сүрүннүүр исписэлииһэ Ольга Андреева үөрүүлээх быһыыга-майгыга туттартаата.
Күрэх түмүгүнэн үһүс миэстэни Маалыкайтан Ольга Николаевна Ушканова, Самырова Мираида Васильевна, 2-с кылаас үөрэнээччитэ Ушканов Афоня, иккиһи Акана нэһилиэгиттэн кыттыбыт Алексеева Серафима Федотовна, Васильева Наталья Викторовна, 7-с кылаас үөрэнээччитэ Эвелина ыллылар. Антоновка нэһилиэгин олохтоохторо, «Ньурба» хаһыат уопсастыбаннай кэрэспэдьиэнэ Иванова Мирослава Николаевна, Николаева Күннэй Семеновна, 10-с кылаас үөрэнээччитэ Сэмира кыайыылаах үрдүк аатын ылан, үөрдүлэр-көттүлэр. Бэйэ-бэйэлэрин эҕэрдэлэһии, уопсай хаартыскаҕа түһүүнэн тэрээһин түмүктэннэ.
Антонина Семенова