Бүгүн, олунньу 13 күнүгэр Николай Харитонов-Чуор аатынан «Кыталык» култуура дыбарыаһыгар Саха тылын уонна суругун-бичигин күнүгэр анаан “Сайдам тыл” түмсүү «Дьиэ кэргэҥҥэ сахалыы эйгэни тэрийии» Ньурба улууһугар бастакы сугулааны тэрийэн ыытта.
Тэрээһиҥҥэ улуус баһылыга Алексей Иннокентьев, улуустааҕы үөрэҕирии салаатын салайааччыта Фёдор Ушканов, улуустааҕы Култуура департаменын салайааччыта Розалия Тихонова кыттыыны ыллылар, эҕэрдэ тыл эттилэр.
Сугулааҥҥа кэлбиттэр «Саха тыына –сүрэхпитигэр» (Уйулҕаҕа Т.Е. Александрова, С.И.Николаева), «Оҕо –Айыы бэлэҕэ» ( кыыс, уол оҕолору саастарынан көрөн иитии Н.Н.Максимова , М.А.Лукина, А.А.Моякунова, Е.Ф.Осипов) , «Саха эйгэтэ үгэспитигэр» маастар- кылааһы ыытыыга сахалыы саламааты астааһыҥҥа — В.П.Филиппова, куппай сон тигиитигэр сүбэлэри — Ю.С.Павлова , таҥаска сахалыы дьүһүйүүнү К.Е. Михайлова ойуулаан көрдөрдө.
Улахан сыанаҕа «Дьиэ кэргэн уйата» дьиэ кэргэннэри кытары көрсүһүүгэ Антоновкатааҕы ПРОФИТ СТАРТ фитнес кулууп салайааччыта Надежда Васильевна , урбаанньыт Егор Альбертович Егоровтар, «Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо көмөнү оҥоруу комплекснай киин» бырааһа Ян Вячеславович, улуустааҕы киин балыыһа терапевтическай отделение медсиэстэрэтэ Саргылана Михайловна Павловтар уонна «Ньурба оройуона» МО контрольнай-счетнай палататын аудитора Ольга Руслановна, улуустааҕы ОДьКХ филиалын урбаанньыта Николай Иванович Васильевтар дьиэ кэргэннэрэ туох дьарыктаахтарын билиһиннэрдилэр, оҕону иитиигэ үөрүйэхтэрин үллэһиннилэр.
Сиһилии «Ньурба» хаһыат кэлэр нүөмэригэр ааҕыҥ.
Антонина Семенова