Бу сырыыга кэпсэтэр хаһыатым дьоруойунан Ньурба улууһун дьокутааттарын Сүбэтин бэрэссэдээтэ Нюргуяна Михайлова буолар. Нюргуяна Михайловна соторутааҕыта Доннааҕы Ростов куоракка баран волонтёрдаан кэлбитэ. Ол тула кэпсэтиибитин хаһыатым ааҕааччыларыгар тиэрдэбин.
-Бу сыл олунньу ый саҕаланыыта бэйэм баҕабынан анал байыаннай дьайыыга сылдьар кэргэммин көрсөөрү Доннааҕы Ростов куоракка баран кэлбитим. Кинини байыаннай чааһа көҥүллээн көрсүсппүппүт.
Ол кэмҥэ биир дойдулаахпыт эчэйэн госпиталга эмтэнэ киирбитин истэн, госпиталга көрсө барбытым. Ыарахан эчэйиини ылбыт эдэр киһи сахалыы саҥаны истэн, биир дойдулааҕын көрсөн наһаа долгуйбута, үөрбүтэ, дойдутун аһылыгын амсайан астыммыта.Хайа да өттүттэн долгуйуу баара… Кинилиин күн бүгүҥҥэ диэри сибээспитин быспаппыт. Эдэр киһи Санкт-Петербурга хас да ый эмтэнэн, протез оҥотторон этэҥҥэ дойдутугар эргиллэн кэлбитэ. Ол кэмҥэ госпиталга сытар ыарахан бааһырыыны ылбыт буойуннар кыра да болҕомтоҕо наадыйалларын, ыарахан эчэйии кэнниттэн миэстэтигэр сирэй көрсөн кэпсэтэр, алтыһар, өйөбүл, күүс-көмө буолар олус наадатын өйдөөбүтүм.
Дойдубар кэлэн улууспут баһылыгар Иннокентьев Алексей Михайловичка хайдах сылдьан кэлбиппин, балаһыанньа хайдаҕын кэспээбитим.Ол иннинэ, саҥа дьыл саҕана, Алексей Михайлович СВО-тан кэлэн баран, анараа госпиталга ордук дьахтар волонтёрга наадыйалларын туһунан эппитэ. «Уоппускаҥ кэмигэр волонтёрдуу барыаххын баҕарбаккын дуо?»- диэн ыйыппытыгар толкуйдуох буолбутум. СӨ Аҕа дойду көмүскээччилэрин дьиэ кэргэттэрин кэмитиэтин салайааччыта Бахилина Марина Константиновна анал байыаннай дьайыыга волонтёрдар наадаларын туһунан эмиэ эппитэ.
Инньэ гынан от ыйын бүтүүтэ Ростовка айаҥҥа туруммутум.
Салгыы Нюргуяна Михайловна атырдьах ый тухары волонтердаабытын, үөрэх саҕаланыан иннинэ дойдутугар кэлбитин туһунан кэпсээтэ.
-Уопсайа, айаммын кытары аахтахха, биир ый буоллум. Москубаттан Ростовка уонна төттөрү кэлэрбэр автобуһунан сылдьыбытым, айан уһуна 15-16 чаас. Ростовка тиийээппин кытары госпиталь хирургическай отделениетыгар санитарынан анаабыттара. Госпиталга үс аҥаар нэдиэлэ курдук үлэлээтим. «КөмүсКэл» сыах тикпит адаптивнай ис таҥастарын бу соторутааҕыта Алексей Михайловичтаах мин үлэлээбит госпитальбар тиэртилэр.
Эмтэнэ сытар уолаттары кытары кэпсэтэн, нүөмэрдэрин ылан, бэйэм кэллиэгэлэрбэр, атын улуустар райсоветтарын бэрэссэдээтэллэригэр, Улан-Удэ салалтатыгар тахсаммын хардарыта сибээс олохтоон, уолаттар санаалара көтөҕүллүбүтэ, соҕотох буолбатах эбиттэрин өйдөөбүттэрэ.Ньурбалар, атын да улуустар уонна передовойга баар буойуннар Ростовка баарбын бэйэ-бэйэлэриттэн истиһэннэр араас боппуруостаах тахсаллара, туруорсар боппуруостарыгар миэстэтигэр үлэлэспитим.
Райсовет бэрэссэдээтэллэрэ дьахталлартан мин бастакынан волонтёрунан сырыттым.
Телефонум статуһуттан көрөн дьон «волонтёр хамнастаах үлэ дуо,төһөнү төлүүллэрий?» диэн ыйыталаспыттара.Волонтёрга хамнас төлөммөт, арай медиссиинискэй үөрэхтээх специалистарга доруобуйа харыстабылын министиэристибэтин нөҥүө хамнастаах вакансиялар бааллара буолуо.Сорохтор СВО ветерана буолаллара буолуо диэн этиилэрэ оруна суох, оннук суох, эн баҕа өттүнэн Ийэ дойдугар, буойуннарбытыгар көмөлөспүт киһи диэн баран көмөлөһөҕүн.
Дойдуларын ахта сылдьар буойуннар, чуолаан бааһырыыны ылбыт буойуннар ийэлии амарах сыһыаҥҥа олуһун наадыйаллар, омугуттан, сааһыттан тутулуга суох барыларыгар оннук сыһыаннаһаҕын.
Москубаҕа баар Саха сирин Бастайааннай Бэрэстэбиитэлистибэтигэр уонна Доннааҕы Ростов куоракка бииргэ алтыһан үлэлээбит дьоннорбор барыларыгар түгэнинэн туһанан махтанабын.
Кэргэним анал дьайыыга барыаҕыттан дойдутугар кэлэ илик, бу бара сырыттахпына үс күн ыытаннар көрсүспүппүт.
Волонтердаан үлэ хайдах барарын билэн кэллим.
-Нюргуяна Михайловна, Ростовка баран кэлии кэнниттэн, туох санаалар киирэллэрий?
-Саҥа дьыл иннинэ Ил Түмэҥҥэ ыытыллыбыт мунньахха тыл этэрбэр анал дьайыыттан төннөн кэлбит дьоҥҥо реабилитационнай кииннэр наадалар диэн туруорсубутум, ол санаам өссө күүһүрэн кэллэ.Хас биирдии улуус киинигэр буойуннар реабилитацияны ааһар кииннэрэ баар буолуохтаах.
Билиҥҥи АБДь буойуннарын техника быыһыыр.Кистэл буолбатах, дронунан киирсии бара турар. Техника эстэр, алдьанар. Онон ардыгар мантан техника барарын тоҕо сотору-сотору биир сиргэ ыыталларый диэччилэргэ эппиэтим итинник — диэн түмүктээтэ Нюргуяна Михайловна.
Антонина Семенова