Ахсынньы 13-17 күннэригэр Дьокуускайга Марха (Ньурба) улууһа тэриллибитэ 200 сылыгар уонна биллиилээх судаарыстыбаннай-бэлитиичэскэй диэйэтэл Александр Гаврилович Габышев төрөөбүтэ 125 сылыгар аналлаах тэрээһиннэр буолаллар.
Онно аан аһааччы быһыытынан, улуус баһылыга Алексей Иннокентьев уонна кини солбуйааччылара Леонид Ушканов (тыа хаһаайыстыбатыгар), Валерия Владимирова (бырайыактыыр үлэҕэ уонна уопсастыбаннаһы кытта үлэҕэ), Хорула нэһилиэгин баһылыга Тимофей Иванов, К.Д.Уткин аатынан Норуоттар доҕордоһууларын билим-чинчийэр отделын салайааччыта Борис Борисов уонна Дьокуускайга Ньурба түмсүүтүн салайааччыта Елена Яковлева «Саха» НКИХ чэппиэрдээҕи «Олох үөһүгэр» биэриитигэр тахсан, улуус урукку олоҕуттан, билиҥҥи үлэтиттэн-хамнаһыттан билиһиннэрдилэр. Бүгүн сарсыарда улуус баһылыга Алексей Иннокентьев «Саҥа күн» биэриигэ кытынна.
Дьокуускайга ыытыллар үбүлүөйдээх тэрээһиннэр былааннара киэҥ. Ол иһигэр улуус олоҕор сыһыаннаах кэскиллээх боппуруостары быһаарарга үлэ эмиэ барар. Бэҕэһээ СӨ Бырабыыталыстыбатын Бэрэссэдээтэлин солбуйааччыта Сергей Местников 2027 с. Ньурбаҕа СӨ норуоттарын IX Спортивнай оонньууларын тэрийэн ыытар өрөспүүбүлүкэтээҕи хамыыһыйа сүбэ мунньаҕын салайан ыытта. Алексей Иннокентьев улууска бэлэмнэнии үлэтэ хайдах барарын иһитиннэрдэ.
Ньурбаҕа 3000 миэстэлээх, ичигэс манежтаах стадион уонна Физкултуурунай-чэбдигирдэр комплекс тутуутугар бу ыйга СӨ Кэлэр көлүөнэлэрин фондатыттан 669 мөл. солк. кэлиэхтээх. Эһиил Чаппандаҕа модульнай спорт саалата «Бизнес-спринт» федеральнай бырайыагынан тутуллуоҕа. СӨ бүддьүөтүн суотугар Антоновкаҕа спортивнай күөн көрсүү саалата бырайыактана сылдьар, федеральнай үп суотугар 2027 с. тутуллан киирэрэ былааннанар. 2025 с. олунньу ыйга концессионнай сөбүлэһиинэн Убайааҥҥа 360 миэстэлээх оскуоланы тутууга куонкурус биллэриллиэҕэ. Бу ый 27 күнүгэр Ньурбаҕа сууккаҕа 1200 кубометр ууну хостоон ыраастыыр ыстаансыйа үлэҕэ киириэҕэ. Сүбэ мунньахха Сергей Местников туһааннаах министиэристибэлэр үлэни күүһүрдэллэригэр сорудахтаата. Өрөспүүбүлүкэтээҕи тэрийэр кэмитиэт аныгыскы мунньаҕа кэлэр сыл бастакы кыбаарталыгар Ньурбаҕа ыытыллара былааннанна.
Бүгүн Гуманитарнай чинчийии уонна Хоту сир аҕыйах ахсааннаах норуоттарын проблемаларын институтун кытта сөбүлэһии түһэрсиллиэҕэ. Сарсын АГИКИ дьиэтигэр «Ньурба оройуонун култуурунай-историческай кода: Дьоннор, Брендэлэр. Сайдыы стратегията» тиэмэҕэ научнай-практическай кэмпириэнсийэ, «Центральнай» кинотеатрга СӨ норуодунай суруйааччыта, «Саха» НКИХ эрэдээктэрэ Наталья Михалева-Сайа салайааччылаах айымньылаах бөлөх устубут «Үһүс үйэҕинэн, баай Ньурба» документальнай киинэ көрдөрүллүөҕэ.
Өйүүн, ахсынньы 15 күнүгэр, А.Е.Кулаковскай-Өксөкүлээх аатынан Норуоттар доҕордоһууларын дьиэтигэр тыа хаһаайыстыбатын 7 тэрилтэтэ уонна 1 агро-оскуола кыттыылаах ас-үөл дьаарбаҥката тэриллиэҕэ. Эмиэ бу күн КНР бырааттыы ситимнээх Цзямусы куоратын кытта дьыалабыай көрсүһүү буолуоҕа, Е.М.Ярославскай аатынан история уонна култуура холбоһуктаах түмэлигэр — «Ньурба улууһа: Үйэттэн үйэҕэ» быыстапка, А.С.Пушкин аатынан Национальнай бибилэтиэкэҕэ «Ньурба улуһа – утум, ситим суолунан» быыстапка аһыллыахтара. Эмиэ ити күн киэһэ А.Е.Кулаковскай-Өксөкүлээх аатынан Норуоттар доҕордоһууларын дьиэтигэр «Кэскили түстүүр – киэҥ Ньурба» аһымал санаа кэнсиэрэ үгүс дьону түмүөҕэ.
Ахсынньы 16 к. улуус дэлэгээссийэтэ Ил Түмэн дьиэтигэр норуот дьокутааттарын уонна СӨ Бырабыыталыстыбатын чилиэннэрин кытта көрсөн, Ньурба улууһун олохтоох салайыныытын актуальнай боппуруостарын туһунан кэпсэтиэхтэрэ. П.А.Ойуунускай аатынан Саха академическай тыйаатырга Марха (Ньурба) улууһа тэриллибитэ 200 сылыгар анаммыт өрөспүүбүлүкэ уопсастыбаннаһын үөрүүлээх мунньаҕа ыытыллыаҕа, РФ уонна СӨ үтүөлээх тренерэ А.И.Пахомов туһунан «Дьоһун олох оҥкуллара» испэктээк премьерата буолуоҕа.
Ахсынньы 17 к. СӨ Бырабыыталыстыбатын 2 №-дээх дьиэтигэр Александр Гаврилович Габышев төрөөбүтэ 125 сылыгар аналлаах өрөспүүбүкэ уопсастыбаннаһын мунньаҕа уонна Үүнэр көлүөнэ тыйаатырыгар С.С.Егоров-Оһоокой Сэмэн айымньытынан «Күн Тэгиэримэн бухатыыр» оҕо испэктээгин премьерата буолуохтара. Итини таһынан бу күннэргэ атын даҕаны хабааннаах көрсүһүүлэр, тэрээһиннэр ыытыллыахтара.
Дьокуускайга олорор биир дойдулаахтарбытын улууспут үбүлүөйдээх тэрээһиннэригэр көхтөөхтүк кыттаргытыгар ыҥырабыт!
Геннадий АНТОНОВ