Кулун тутар 26-27 күннэригэр Ньурбатааҕы үөрэҕирии салаатыгар инбэлиит уонна доруобуйаларынан хааччахтаах оскуола иннинээҕи уонна оскуола саастаах оҕолорго комплекснай көмөнү оҥорууга, Ил Дархан гранын үбүлээһининэн көрсүһүү тэрилиннэ.
«Харысхал» үтүөнү оҥорор пуонда (благотворительный фонд «Харысхал») Саха сиригэр инбэлиит уонна доруобуйаларынан хааччахтаах оҕолору уонна кинилэр дьиэ кэргэттэрин өйүүр тэрилтэ быһыытынан өрөспүүбүлүкэҕэ биллэр. Пуонда «Мир глазами моего ребёнка» өрөспүүбүлүкэ таһымнаах педагогическай десаннары оҥорор. Социальнай көмө уонна чөл туруктаах буолууга элбэх бырайыактары, аһымал аахсыйалары тэрийэн ыытар.
«Харысхал» пуонда салайааччыта, инклюзивнай үөрэҕирии эксперэ, үрдүк категориялаах дефектолог, логопед учуутал, кулгаахтарынан кыайан истибэт оҕолору үөрэтэр педагог Петрова Сахаяна Иннокентьевна, СӨ үөрэҕириитин систиэмэтин туйгуна, үрдүкү категориялаах учуутал Слепцова Ньургустана Михайловна Ньурбаҕа үлэлээтилэр.
Ол курдук, пуонда кулун тутар 26 күнүгэр үөрэҕирии салаатын үлэһиттэригэр, инбэлиит уонна доруобуйаларынан хааччаахтаах оҕолор төрөппүттэригэр анаан «Доруобуйаларынан хааччахтаах оскуола иннинээҕи саастаах уонна оскуола саастаах оҕолорго комплекснай көмөнү оҥоруу» уустук балаһыанньаҕа түбэспит, ураты оҕолорго уонна кинилэр дьиэ кэргэттэригэр оскуола иннинээҕи саастаах уонна оскуола саастаах оҕолорго, педагогтарга аналлаах семинар ыытта.
Салгыы Ньурбатааҕы улуустар икки ардыларынааҕы дьиэ кэргэҥҥэ уонна оҕоҕо көмөнү оҥоруу комплекснай киин үлэһиттэрин, хааччахтаах оҕолор төрөппүттэрин кытары көрүстүлэр. Кыайан истибэт, саҥарбат оҕолорго медико-социальнай реабилитация, психолого-педагогическай көмөлтөҕө саҥа уларыйыылары билиһиннэрдилэр.
Кулун тутар 27 күнүгэр улуустааҕы административнай кииҥҥэ улуустааҕы социальнай харалта, Ньурбатааҕы эппиэкэ уонна попечительство салаата, Киин балыыһа уонна улуустар икки ардыларынааҕыдьиэ кэргэҥҥэ уонна оҕоҕо көмөнү оҥоруу комплекснай киин, Акана уонна уонна Күндээдэ нэһилиэктэриттэн бэрэстэбиитэллэр кыттыылаах доруобуйаларынан хааччахтаах оҕолорго аналлаах көрсүһүү буолла.
Көрсүһүүнү Ньурбатааҕы үөрэҕирии салаатын салайааччытын I-кы солбуйааччыта Сергей Викторович Васильев аста. Семинары Ньурба оройуонун үѳрэҕирии салалтатын бырайыактыыр отделын салайааччыта Васильева Сардана Ивановна салайан ыытта.
Уһуйааннарга, оскуолаларга комплекснай үлэни тэрийиигэ ППК (педагогическай консилиум психолога) кыра саастаах оҕолор доруобуйаларыгар кэһиллии баарын көрөн, кинилэри кытары учуутал, логопед, уйулҕа исписэлиистэрэ кэмигэр коррекционнай үлэни ыытарга, оҕо сайдыытыгар көмөнү оҥорууга, оҕолору айар үлэҕэ, спорка дьоҕурдарынан көрөн сайыннарыыга Сахаяна Петрова уонна Ньургустана Слепцова бэйэлэрин уопуттарын билиһиннэрдилэр.
Көрсүһүү кыттыылаахтара үөрэҕириигэ, доруобуйаҕа сыһыаннаан ураты оҕолорго көмө оҥорууга реабилитацияны ааһыы, эмтэнии, эмп, доруобуйаларынан хааччахтаах (ОВЗ) оҕолор уустук балаһыанньаҕа түбэстэхтэринэ хантан көмө ылыахтарын сөбүн, дьиэҕэ-уокка сыһыаннаах боппуруостары биэрдилэр.
Көрсүһүү кыттыылаахтарын боппуруостарыгар Сахаяна Петрова, Ньургустана Слепцова сиһилии эппиэттэри, сүбэлэри биэрдилэр.
Бу күн «Харысхал» пуонда бэрэстэбиитэллэрэ Ньурбатааҕы элбэх хайысхалаах гимназияҕа, «Кэскил» оҕо уһуйааныгар сырыттылар.
Сиһилии «Ньурба» хаһыат кэлэр нүөмэригэр ааҕаарыҥ.
Антонина СЕМЁНОВА