🎵Аан дойдутааҕы Хомус киинэ Ньурба улууһун кытта быһаччы ситимэ диэн — Ксенофонт Дмитриевич Уткин-Нүһүлгэн буолар. К.Д. Уткин хомус түмэлин төрүттэниитигэр бастакы дириэктэринэн үлэлээбит, хомус сайдыытын салайсыбыт, төрүттэспит киһи буоларын сыаналаан туран уонна төрөөбүтэ 90 сылынан Ньурба улууһугар суолта биэрэн туран, «Хомус эйгэтэ» бырайыак бүгүн үөрүүлээх быһыыга майгыга аһылынна!
Олунньу 11-12 күннэригэр 2025 с. Хомус аан дойдутааҕы киинэ уонна түмэлэ «Хомус эйгэтэ» бырайыагынан Ньурба улууһугар, Антоновка орто оскуолатыгар улуус бары нэһилиэктэриттэн үөрэнээччилэри түмэн, хомус төрүт тардыытыгар уһуйа сылдьаллар. Хомус уһуйааччыларынан буолаллар: Хомус түмэлин үлэһиттэрэ, импровизатор хомусчуттар — Алена Гавриловна Платонова уонна Айсен Петрович Деллохов.
«Хомус эйгэтэ» бырайыак 2025 сылтан саҕалаан, Саха Өрөспүүбүлүкэтин үрдүнэн 8 улууһу хабан үлэлиэхтээх. Бу бырайыак оскуола үөрэнээччилэригэр култуурунай-үөрэх эйгэтин сайыннарар сыаллаах тэрилиннэ.
Бырайыак сүрүн партнердарынан СӨ Кэлэр көлүөнэлэрин тус сыаллаах фондата уонна «Хомус аан дойдутааҕы киинэ уонна түмэлэ» СӨ судаарыстыбаннай тэрилтэтэ буолаллар.
Бырайыак чэрчитинэн Анал байыаннай дьайыы кыттыылаахтарын дьиэ кэргэттэрин оҕолоругар Мэҥэ Хаҥалас улууһун Майа нэһилиэгин тимир ууһа Роман Владимирович Иванов оҥорбут 20 хомустарын үөрүүлээх быһыыга-майгыга туттардылар.
Айсен Петрович бириэмэтин аттаран, улуус баһылыгын солбуйааччыта Валерия Гаврильевна Владимирова кытта көрсөн илэ-хоро кэпсэтэн барда.
А.П. Деллоховка иһитиннэриини, хаартыскалары бэлэмнээбитин иһин махтанабыт.
Улуус дьаһалтатын пресс-сулууспата