♥ Тохсунньу 18 күнүгэр Хорула нэһилиэгэр Дьиэ кэргэн сылыгар Надежда Авзалтиновна уонна Василий Васильевич Кюдяковтары 50 сылларын бэлиэтээн чиэстээтилэр.
👩👩👧👦Кюдяковтар оҕолорун, сиэннэрин, хос сиэннэрин, аймах — билэ дьоннорун кытта Олоҥхо Балаҕаныгар аал уот оттон, арыылаах алаадьынан айах тутан үтүө баҕа санааларын ыччат дьонноругар анаатылар.
Василий Васильевич 50 сыл анараа өттүгэр Өлүөхүмэ куоратыгар суоппар идэтигэр үөрэнэ сылдьан сытыы — хотуу Надежда кыыһы көрсөн сүрэхтэринэн сөбүлэһэн, харахтарынан хайҕаһан ыал буолбуттара. Надеждалаах Василий 5 оҕону төрөтөн, улаатыннаран, дьон кэккэтигэр таһааран, билигин уонтан тахса сиэн, хос сиэн иһирэх эбээлээх эһээлэрэ.
Василий Васильевич педагогическай үлэ бэтэрээнэ, көҥүл тустуу спордун маастара, пропагандиһа, араас таһымнаах күрэхтэһиилэр солбуллубат судьуйата буолар. Элбэх көлүөнэ оҕону тиэхиньикэҕэ, спорка сыһыарбыт улахан кылааттаах киһинэн биллэр. Надежда Авзалтиновнаҕа уонна Василий Васильевичка инникитин олоҥхо курдук уһун, сибэкки курдук кэрэ олоҕу баҕарабыт!🎉🎉🎉🌷🌷🌷☀️☀️☀️🌸🌸🌸
Лариса Андросова