Алтынньы 29 күнүгэр Ньурба түмэлин быыстапкалыыр саалатыгар «Хорула нэһилиэгэ» МТ быыстапката аһылынна. Быыстапка «Ньурба оройуона: үйэттэн үйэҕэ» Марха улууһа төрүттэммитэ 200 сылыгар анааллаах нэһилиэктэр быыстапкаларын чэрчитинэн турда.
Хорула сиригэр учуонайдар сабаҕалыылларынан сахалар XVII үйэ иккис аҥарыгар көһөн кэлбиттэр. Үһүйээн кэпсииринэн Хорула Боотур Тыгынтан куотан кэлэригэр 6 табаарыстарынаан тиийэн кэлбит. Аан бастаан Хорула Боотур билиҥҥи Сабыыла (Хорулаттан чугас сир) сиригэр тоҥус уустара олорор сирдэригэр тиийэн, кинилэри кытта алтыһан, бултаан-алтаан олорбут. Кэлин тоҥус уустарын кыыһын төрөппүттэриттэн сөбүлэҥнэрин ылан ойох ылан олорорун түһүлгэ тоҥустара «Бултаах-алтаах сирбитин соҕотох кини эрэ бас билииһи. Аны бэйэбит хоһууммутугар анана сылдьыбыт кыыһы күрэтэн ылла»,- диэн сөбүлээбэттэр. Бииргэ олорон бултаан олоруо суохтарын билэн, Хорула ойоҕун илдьэ билиҥҥи Сайылык бөһүөлэгин таһыгар, Хорула Маара диэн кус хараҕын саҕа кыра уулаах сиргэ олохсуйбут.
Хорула нэһилиэгэ 1897 сыл муус устар 30 к. тэриллибит. Нэһилиэк бастакы кинээһинэн Торбуох Аҕатын ууһун киһитэ Герасим Никифоров талыллыбыт.
Саҥа быыстапка аһыллыбытынан эҕэрдэлээтилэр «Ньурба оройуона» МТ баһылыгын 1-кы солбуйааччыта В.Н. Семенов, Ньурба оройуонун дьокутааттарын Сэбиэтин бэрэссэдээтэлэ Н.М. Михайлова, К.Д. Уткин аатынан Норуоттар доҕордоһуулара түмэл дириэктэрэ А.А. Туманова, «Хорула нэһилиэгэ» МТ баһылыга Т.А. Иванов, Ньурба улууһун Култуураҕа департаменын салайааччытын солбуйааччы Д.И. Бурнашева.
Хорула былыр-былыргыттан уутуйан олорбут устар ууну сомоҕолуур уран тыллаах олоҥхоһуттардааҕынан биллэр. Хорула нэһилиэгэр сурукка киирбитинэн 17 олоҥхоһуттаах, олортон биирдэстэрэ Ийэ олоҥхоһут В.И. Иванов-Чиллэ Баһылай буолар. Кини кэлбит ыалдьыттарга бэйэтин олоҥхотутуттан быһа тардан иһитиннэрдэ уонна Хорула туһунан ырыа ыллаан бэлэхтээтэ.
Быыстапка устун экскурсияны И.С. Жараев аатынан модельнай библиотека сэбиэдиссэйэ Л.И. Андросова ыытта. Быыстапкаҕа нэһилиэк былыргытын, билиҥҥи олоҕун, биллэр, киэн туттар дьонун көрдөрөр матырыйааллар турдулар: былыргы уустар мас оҥоһуктара, булт тэриллэрэ, дьэрэкээн оһуордаах иһиттэр-хомуостар, аныгы маастардар, иистэнньэҥнэр үлэлэрэ о.д.а.
Ньурба улууһун биир саамай уһук дэриэбинэтэ Хорула быыстапкатыгар сылдьаргытыгар бар дьоммутун ыҥырабыт!
Быыстапка сэтинньи 4 к. диэри туруоҕа.
Ньурба түмэлин пресс-сулууспата