Бэс ыйын 11 күнүгэр Сүлэ нэһилиэгин «Айыы Тайбыт» Култуура киинигэр «ИККИ СУЛУС» күрэх тэрээһиннээхтик, өрө күүрүүлээхтик ааста.
Күрэх 2026 сылы быһа ыытыллар «Култуура уонна Успуорт — Бииргэм тыын» бэстибээл чэрчитинэн тэрилиннэ. Бу тэрээһин Арассыыйаҕа Норуоттар сомоҕолоһууларын, Саха Өрөспүүбүлүкэтигэр Култуура, Ньурба оройуонугар Успуорт сылларыгар, Сүлэҕэ Олох-дьаһах эйгэтин тупсарыы сылыгар, ону таһынан 2027 сыллаахха Ньурба улууһугар ыытыллар Саха Өрөспүүбүлүкэтин норуоттарын IX Спортивнай оонньууларыгар ананна.
Күрэххэ барыта 5 дуэт кытынна. Дьүүллүүр сүбэ састаабыгар маннык дьон үлэлээтилэр: Меркурий Юрьевич Таюрскай — СӨ үөрэҕириитин туйгуна, Ньурба оройуонун үөрэҕириитин үлэһиттэрин профсойууһун бэрэссэдээтэлэ, урбаан тэрилтэлэр профсойуустарын координационнай Сэбиэтин бэрэссэдээтэлэ, улуус сүбэтин бэрэссэдээтэлин солбуйааччыта;
Светлана Васильевна Васильева — СӨ үөрэҕириитин туйгуна, Ньурба куорат элбэх хайысхалаах гимназиятын муусука үрдүк категориялаах учуутала, Николай Иванович Харитонов-Николай Чуор аатынан «Кыталык» Култуура дыбарыаһын исписэлииһэ;
Виктория Викторовна Захарова — Октябрьскай нэһилиэк дьаһалтатын исписэлииһэ.
«Икки сулус» күрэххэ биэс күүстээх дуэт кыттыыны ылла. Кыттааччылар уопуттаах ырыаһыттары, култуура үлэһиттэрин уонна Ньурба сулустарын кытта чаҕылхайдык ыллаатылар. Маннык дуэттар киирдилэр:
Дмитрий Юрьевич Иванов уонна А.Я. Овчинникова аатынан «Түһүлгэ» НАДь салайааччыта Матрена Прокопьевна Захарова;
Айталина Иванова уонна М.М. Борисова аатынан «Утум» КК уус-уран салайааччыта Владимир Иванов;
Алексей Николаев уонна А.Я. Овчинникова аатынан «Түһүлгэ» НАДь фольклорун салайааччыта Изабелла Ефимова;
Дарья Абрамова уонна Ньурба оройуонун култуураҕа уонна ыччат бэлиитикэтин департаменын методическай отделын испэсэлииһэ Алена Руфова;
Наталья Винокурова уонна Н.И. Харитонов-Николай Чуор аатынан «Кыталык» КД ырыаһыта, хормейстера Снежана Черноградская.
Кыттааччылар көрөөччүлэргэ ылбаҕай ырыалары уонна истиҥ нүөмэрдэри бэлэхтээтилэр.
Дьүүллүүр сүбэ быһаарыытынан түмүк маннык буолла: 1 миэстэ — Дарья Абрамова уонна Алена Руфова;
2 миэстэ — Наталья Винокурова уонна Снежана Черноградская;
3 миэстэ — Дмитрий Иванов уонна Матрена Захарова.
Бу киэһэ көрөөччүлэр ырыаһыттар истиҥ иэйиилээх толорууларыттан олус астыннылар.
Тэрээһини «Түһүлгэ» НАДь үҥкүү бөлөҕө үҥкүүнэн киэргэттэ. «Икки сулуһу» Ирина Николаева уонна Михаил Антонов иилээн-саҕалаан ыыттылар. Уопсайынан, күрэх эмиэ тыҥааһыннаах, эмиэ истиҥ иһирэх буолан ааста уонна дьон-сэргэ биһирэбилин ылла.
Марина Герасимова