Балаҕан ыйын 3-6 куннэригэр, Владивосток куоракка Илиҥҥи Экономическай Форум иһинэн сахалыы остуол оонньууларга хабылыкка, хаамыскаҕа күрэх ыытылынна.
Күрэххэ 14 араас дойдулар:Индия, Ангола, Киргизия, Сирия, Казахстан, Монголия, Замбия, Марокко, Россия, Конго, Египет, Узбекистан, Нигерия, Туркменистан спортсменнара кыттыыны ыллылар.
Саха сирин хабылыкка Федерациятын председателэ, «Көмүлүөк» хампаанньа генеральнай дириэктэрэ Ольга Григорьевна Григорьева күрэхтэһээччилэр, ыалдьыттар иннилэригэр киирии тыл эттэ, өбүгэлэрбит оонньуулара хабылык, хаамыска аан-дойду таһымыгар тахсан эрэриттэн киэн-туттарын туһунан кэпсээтэ. Федерация чилиэннэрэ, Саха сирин хабылыкка, хаамыскаҕа спорт маастардара Лариса Иванова, Надежда Троева, Ньургун Семенов, маастарга кандидат Вероника Иванова күрэхтэһээччилэр иннилэригэр маастар-кылаас көрдөрдүлэр, элбэх интэриэһиргиир боппуруостарга эппиэттээтилэр.
Омук спортсменнара сорохторо нууччалыы саҥараллар, өйдүүллэр эбит, ону таһынан Вероника Иванова английскайдыы үчүгэйдик саҥарар, өйдүүр буолан билбэт тыллары быһааран биэрэ, кэпсэтэ сырытта.
Киэһэ хойукка диэри эрчиллии буолла, бары да кыайар баҕалара баһаам эбит. Оонньуулларыттан көрдөххө, кэпсээннэриттэн иһиттэххэ, Ангола, Сирия, Узбекистан, Казахстан, Туркменистан, Марокко, Индия курдук дойдуларга хаамысканы кыра эрдэхтэриттэн оонньууллар эбит. Сирияттан сылдьар Аль Фарфан Басель кэпсииринэн бииргэ төрөөбүттэрин кытта дьиэлэригэр уруоктарын үөрэппэккэ 3-туу чаас оонньоон төрөппүттэриттэн мөҕүллэр эбиттэр. Онтон дьэ, сахалар, былыргыны сөргүтэн дьарык гына сылдьар хабылыкпыт ханнык да дойдуга суох эбит, ол аата, биһиги өбүгэлэрбит кыра эрдэхтэриттэн сөбүлээн оонньообут хабылыктара аан-дойдуга соҕотох дьарык эбит диэн бэлиэтиэххэ наада.
Күрэхтэһээччилэргэ хас биирдиилэригэр Саха сиригэр «Тэтим» хампаанньаҕа оҥотторон аҕалбыт анал футболкаларын туттартаата. Онтон кылаабынай судьуйа Анжела Тимофеевна Андросова күрэх быраабылатын билиһиннэрдэ уонна күрэх сүрүн секретарынаан Семенов Ньургун Ефремовичтыын жеребьевка ыыттылар. Бастакы күн түмүгүнэн, Улуу Кыайыы 80 сылыгар аналлаах спортсменнар куүүстэринэн концерт буолла, бары да талааннаах эбиттэр, араас омук ырыатын, хоһоонун, үҥкүүтүн көрөн мустубут дьон астыннылар, бутэһигэр судьуйалар бары тахсан С.Тимофеев тылыгар «Эйэ, дьол иһин» ырыаны ыллаатылар. Концертка кыттыбыт спортсменнарга хас биирдиилэригэр Ольга Григорьевна «Кемулуек» сыаналаах бэлэхтэрин туттартаата.
Сарсыҥҥы кунүгэр күрэх Саха сирин павильонугар ыытылынна. 7 кыыс, 7 уол буолан арахсан, биирдиилээн күрэхтэстилэр. Бастаан хабылык, онтон боростой хаамыска оонньонно. Бу күн былыттаах, күүстээх самыырдаах да буоллар уопсай настарыанньаны алдьаппата, төттөрүтүн олус сытыытык, көхтөөхтүк барда. Спортсменнар бэлэмнээхтэрэ көстөр. Дьокуускайтан илдьэ кэлбит хабылыктыыр, хаамыскалыыр анал остуолларбытыгар оонньоотулар. В. Иванова, Н. Троева, Л. Иванова судьуйалаатылар, А. Андросова сүрүн судьуйа, Н. Семенов сүрүн сэкирэтээр эбээһинэһин эппиэтинэстээхтик толордулар. Күрэх хаамыытын Москва куораттан сылдьар Игорь Галутва кэпсии, быһаара турда.
Уопсай түмүгүнэн: хабылык эр дьоҥҥо:
1 место — Al Farwan Basel (Сирия)
2 место — Tarek Ahmed Ibrahim Ahmed Elashry (Египет)
3 место — Anufriv Semyon (Россия)
Хабылык дьахталларга:
1 место — Chioca Leticia Ngueve Galinha (Aнгола)
2 место — Imrani Amina (Марокко)
3 место — Arti Gupta (Индия)
Хаамыска эр дьоҥҥо:
1 место — Al Farwan Basel
2 место — Choica Zacarias Mario Galinha
3 место — Movlanov Allamyrat
Хаамыска дьахталларга:
1 место — Imrani Amina (Марокко)
2 место — Chioca Leticia Ngueve Galinha (Aнгола)
3 место — Arti Gupta (Индия).
Күрэх түмүгүнэн үөрүүлээх быһыыга-майгыга кыайыылаахтар мэтээл, диплом уонна «Көмүлүөк» атыы-эргиэн хампаанньа сыаналаах улахан таас чорооннорунан наҕараадаланан үөрдүлэр-көттүлэр.Күрэх кэмигэр Ил Дархаммыт А.С. Николаев кэлэн көрдө-иһиттэ, спортсменнарга ситиһиилэри баҕарда. Ольга Григорьевна кыра иһитиннэрии оҥордо, уопсай хаартыскаҕа түһүү буолла.
Спортсменнар Ил Дархан бэйэтинэн кэлэн күрэҕи сыаналаан барбытыгар астыннылар, долгуйдулар. Уопсайынан, Саха сирин хабылык Федерациятын председателэ, «Көмүлүөк» хампаанньа генеральнай директора Ольга Григорьева Илиҥҥи Экономическай Форумҥа кыттарыгар хамаанда тэринэн өбүгэлэрбит оонньууларын Аан-дойду таһымыгар таһааран, көрдөрөн-иһитиннэрэн, күрэх оонньотон, сыаналаах бириистэри туруорбута олус хайҕабыллаах дьыала.
Бу үрдүк таһымнаах араас тас-дойдулартан кэлэн инники сайдыы-доҕордоһуу боппуруостарын быһаарар Форумҥа биһиги, сахалар, өбугэлэрбит оонньууларын хабылыгы, хаамысканы билиһиннэрбиппитинэн, көрдөрбүппүтүнэн киэн туттабыт! Омугуттан тутулуга суох , араас тылынан да саҥардарбыт, бэйэ-бэйэбитин өйдөһөн, иллээх -эйэлээх дьиэ-кэргэн курдук сырыттыбыт.
Л. Иванова, Саха сирин хабылыкка Федерациятын чилиэнэ