Ньурбаҕа Спорт, Күндээдэҕэ Төрөөбүт дойдуга бэриниилээх буолуу сылларынан нэһилиэк ветеран волейболистара 2025 сыллаахха Кыайыы 80 сылынан олохтообут көһө сылдьар Кыайыы Кубогын иһин Күндээдэ нэһилиэгэр алтынньы ый 23-24 күннэригэр түөлбэнэн волейбол күрэхтэһиитэ бэрт киирсиилээхтик буолан ааста.
Ону сэргэ хабылык, хаамыска күрэҕэ түөлбэнэн уонна биирдиилээн көрдөрүү иһин ыытылынна. Быйыл волейбол күрэхтэһиитэ уратыта диэн дьахталлар уонна эр дьон хамаандалара туһунан турда. Түөлбэ хамаандатыгар оскуола оҕото кииристэ. Маннык тэрээһиннэргэ оҕо кыттыыны ылан нэһилиэгин, түөлбэтин дьонун-сэргэтин кытта ыкса билсэр, түөлбэтин чиэһин көмүскүүр.
Түмүккэ, волейболга I миэстэ «Кустук» түөлбэ, салайааччы Емельянова Г. Р. уонна 2025 сылга ылбыт Кыайыы Кубога эмиэ кинилэргэ барда. II миэстэ «Дьулуур» түөлбэ, салайааччы Борисова Р. В. III миэстэ «Аартык» түөлбэ, салайааччы Саввинова В. А. «Лучший игрок» анал ааттары уолаттарга Ананьев Никола, Петров Женя, кыргыттарга Ананьева Люба, Кураева Оля, дьахталларга Иванова Парасковья ыллылар. «60 сыл устата бэтэрээн волейболист» — Замятина Светлана Алексеевна, күрэх аайы көрөр-истэр, сыаналыыр, көтүппэккэ сылдьар «Бэриниилээх болельщик» ааты ылла Яковлева Розалия Никифоровна.
Хабылык, хаамыска күрэҕэр үс категорияҕа арааран түөлбэттэн: эдэр, бэтэрээн, оскуола оҕото састааптаах хамаанда турда. Үрдүк көрдөрүүлээх бастакы миэстэлээхтэр грамотанан наҕараадаланнылар. Оскуола оҕолоруттан Кураева Юлиана, Васильев Айдын, эдэрдэргэ Варламова Ольга, Осипов Гаврил, бэтэрээннэргэ Емельянова Галина, Саввинов Владимир. Түөлбэнэн түмүк: I миэстэ «Кустук», II миэстэ «Дьулуур», III миэстэ «Аартык».
Нэһилиэккэ ыытыллар күрэхтэһиилэргэ да, тэрээһиннэргэ да түөлбэ салайааччылара улахан күүс-көмө буолаллар. Бу дьыл бүтэ илигинэ өссө түөлбэнэн күрэхтэһиилэр былааҥҥа бааллар.
Күндээдэ нэһилиэгин спорт специалиһа Маргарита Кураева