Чаппанда нэһилиэгэр кулун тутар 14 күнүгэр Арассыыйаҕа Норуоттар сомоҕолоһууларын, Сахабыт өрөспүүбүлүкэтигэр култуура сылларыгар олоҕуран М.С. Семенов аатынан «Дьоҕур» норуот айымньытын дьиэтигэр уус-уран салайааччы Семенова С.Д. бырайыагынан 6 сылын ыытыллар «Көмүс саас Далбар хотуна-2026» күрэс бэрт тэрээһиннээхтик буолан ааста.
Күрэскэ барыта 5 нэһилиэктэн кэлэн кыттыыны ыллылар: ол курдук күн тахсар Күндээдэ нэһилиэгиттэн Замятина С.А, мааны Маар сириттэн Иванова В.В, үлэһит үтүө дьоннордоох Ньурбачаан сириттэн Попова Р.Н., чаҕыл уоттаах Чаппандаттан Федорова П.Н., Ньурбабыт улууһун кииниттэн, Ньурба куораттан Антонова М.В.
Балаһыанньа быһыытынан күрэх түөрт түһүмэхтэнэн ыал ийэтэ, эбээтэ дьиэтээҕи түбүктэн сынньана, аралдьыйа, таах олорбокко, саха сатаабатаҕа суох диэбиттии күрэхтэһээччилэр талааннарын толору арыйан, уустаан–ураннаан саҥардан, үрдүк сыанаҕа маанытык таҥнан хаамтаран кэрэ аҥардарбыт ытыс дохсун тыаһа доҕуһуоллаах, толлубакка кыттан бэрт сэргэх күрэс буолла.
Үһүс түһүмэх Далбар хотуттар астаан аҕалбыт астарын көрдөрөн, кэпсээн, амсатан көрдөрдүлэр.
Күрэх түмүгэ тойон сүбэ көрүүтүнэн маннык буолла, “Муударай саас Далбар хотуна” — Мария Васильевна Антонова Ньурба бэтэрээннэрин талааннаах далбара.
«Күбэйэ саас Далбар хотуна” — Чаппанда “Алгыма” эбээлэр түмсүүлэрин салайааччыта П.Н. Федорова.
“Талба саас Далбар хотуна” — Күндээдэ нэһилиэгиттэн Замятина Светлана Алексеевна.
“Эрчимнээх саас Далбар хотуна” — Түмүк нэһилиэгин далбара Ирина Ивановна Васильева.
“Көмүс саас Далбар хотуна” — Ньурбачаан нэһилиэгин » Сүүтүк» иис түмсүүтүн салайааччыта Попова Розалия Николаевна.
Бары күрэх кыттааччылара анал суруктаах лиэнтэлэри кэттилэр, Добун суруктары, бириистэри туттулар. Манна кыттыбыт бары кыттааччылар Семенова С.Д. таһаарар “Көмүс саас Далбар хотуна” альбом-кинигэтигэр киирэн үйэтиллиэхтэрэ.
Күрэх кыттааччыларыгар кэлэн кыттыыны ылбыккытыгар уонна тойон сүбэҕэ махталбытын тириэрдэбит. Куруук маннык бары биир сомоҕо, көхтөөх буолуоҕуҥ.
Тимофеева Е.С.