Бэҕэһээ, муус устар 9 күнүгэр, Ньурба к. «Кыталык» КД-гар педагогическай үлэ бэтэрээнэ, СӨ үөрэҕин туйгуна, улуус уус-уран оҥоһуктарын маастара, көхтөөх уопсастыбанньык, СВО волонтера Петрова Анна Андреевна олохтон барбыта 40 күнүгэр, кини сырдык кэриэһигэр аналлаах истиҥ көрсүһүү буолан ааста. А.А.Петрова чугас дьоно, аймахтара, бииргэ алтыспыт-үлэлээбит дьүөгэлэрэ, ол иһигэр «КөмүсКэл» волонтерскай сыах чилиэннэрэ, үөрэппит оҕолоро уо.д.а. кытыннылар.
Анна Андреевна туһунан истиҥник-иһирэхтик аҕыннылар, кини аата-суола үйэлэргэ салҕанан бара туруоҕун долгуйан туран бэлиэтээтилэр. Кини иллээх-эйэлээх дьиэ кэргэн тапталлаах ийэтэ, эбэтэ, эрэллээх дьүөгэ, оҕо-аймах таптыыр-ытыктыыр учуутала эрэ буолбакка, айылҕаттан бэриллибит, кэрэни айар уһулуччу талааннааҕа. Ытыктыыр киһибит хартыыналара, иистэрэ, элбэх сыратын ууран кыттыспыт айымньылаах үлэлэрэ көрдөрүүгэ турдулар.
Анна Андреевна Петрова Дьаархан, Маалыкай, Малдьаҕар оскуолаларыгар, Ньурбатааҕы техническэй лицейгэ математика учууталынан, Ньурбатааҕы колледж дириэктэрин солбуйааччытынан, дириэктэринэн, Оҕону эбии үөрэхтээһин киинигэр ситиһиилээхтик улууска үөрэх сайдыытыгар дьоһун кылаатын киллэрбитэ. Бочуоттаах сынньалаҥҥа тахсан да баран, айымньылаах үлэттэн тэйбэтэҕэ. «Кыталык» КД иһинэн «Кыбытык тигии» түмсүүгэ уонна «КөмүсКэл» волонтерскай сыахха үлэлээн иистэнэрэ. Илиитин сылааһын иҥэрэн элбэх наадалаах малы-салы тигэн, СВО кыттыылаахтарыгар улаханнык көмөлөспүтэ. Бу дьулуурдаах үлэтин иһин Анна Андреевна СӨ Добровольческай ресурснай киинин «Анал байыаннай дьайыы кыттыылааҕар көмөтүн иһин» анал бэлиэнэн наҕараадаламмыта. Анна Андреевна олоҕо кини кыыһыгар Марияҕа уонна сиэннэригэр салҕанар.
Ньурбатааҕы техническэй лицей информатикаҕа учуутала, СӨ Судаарыстыбаннай бириэмийэтин лауреата Николай Николаевич Петров: «Кэргэним Анна Андреевна биһикки ыал буолбуппут быйыл 40 сыла буолуохтаах этэ, хомойуох иһин, онно кыранан тиийбэтэ. Кэргэним биһикки бу сыллар тухары бэйэ-бэйэбитин өйдөһөн, иллээхтик, дьоллоохтук олордубут. Бииргэ үлэлээбит, бииргэ дьарыктаммыт дьонугар улахан махталбын тиэрдэбин, кэргэним туһунан үтүө-кэрэ тылларын иһин. 40 хонуга туоларыгар бэйэтэ да истэн барбыта буолуо диэн санаалаахпын. Бары доруобай, этэҥҥэ буолуҥ».
Ытыктыыр күндү учууталбыт туһунан сырдык өйдөбүл биһиги өйбүтүгэр-сүрэхпитигэр мэлдьи тыыннаах буолуоҕа.
Үөрэнээччитэ Геннадий АНТОНОВ