Олунньу 20-21 күннэригэр Ньурбатааҕы көһө сылдьар драматическай тыйаатырга Иннокентий Авксентьевич Дмитриев — Сиэн Чолбодук 95 сааһыгар анаан «Мүчүк-2026» региональнай театральнай фестиваль-күрэс саҕаланна.
Испэктээктэр саҕалана иликтэринэ Ньурба 3 №-дээх оскуолатын дириэктэрэ Петр Кузьмин, тыйаатыр дириэктэрэ Анна Багмет эҕэрдэ киирии тыл эттилэр.
Быйылгы фестиваль Ньурба 3 №-дээх оскуола — 55, Ньурбатааҕы көһө сылдьар драматическай тыйаатыр — 60 сылларыгар уонна СӨ Култуура сылыгар ананан ыытыллар.
Театральнай фестивальга Маар, Киирэп, Ньурба 3 №, Үөдэй, Малдьаҕар, Бүлүү улууһуттан Кыадаҥда, Сунтаардааҕы Түбэй Дьаархан, Хатыы алын сүһүөх оскуолалара кытыннылар. Бастакы күҥҥэ алын сүһүөх кылаастар оонньоон көрдөрдүлэр.
«Үрүҥ көмүс хотоҕой» (Сиэн Чолбодук), «Кыһыл былааттаах кыыс» (Тимофей Егорович Сметанин), «Хараҥаҕа тыкпыт сырдык» (Д.К. Сивцев Суорун Омоллоон), «Пионер Сима Сергеев» (М. Обутова-Эверстова), «Хачыгыр» (С.С.Яковлев-Эрилик Эристиин), «Кэҕэ» (ненецкэй норуодунай остуоруйа), «Эбирчээнэ Куурусса» (нуучча норуодунай остуоруйата), «Биэс ынахтаах Бэйбэрикээн эмээхсин» саха норуодунай остуоруйатыттан оҕолор быһа тардан оонньоон көрдөрдүлэр.
Дьүүллүүр сүбэҕэ Ньурба тыйаатырыттан Аламай Айыы Алаас Кыыһа, улуустааҕы үөрэҕирии салалтатыттан үөрэҕирии салайааччытын солбуйааччыта Елена Котоконова, «Ромашка» уһуйаан иитээччитэ Любовь Михайлова, улуустааҕы киин бибилэтиэкэ бибилэтиэкэрэ Юлия Максимова үлэлээтилэр.
«Мүчүк» региональнай фестиваль талааннаах оҕолору сайыннарыыга, оҕо дьоҕурун байытыыга, тарҕатыыга ананан ыытыллар.
Антонина Семёнова