Ыам ыйын 18 күнүгэр СӨ норуоттарын IX Спортивнай оонньууларын дириэксийэтин бэрэссэдээтэлэ Артур Яковлев видеоконференц-сибээһинэн нэһилиэктэр пресс-сулууспаларын үлэһиттэрин мунньаҕын салайан ыытта.
Артур Янович бу күннэргэ дьон хантан иһитиннэрии ыларын, төһө элбэх оройуон сонуннарын ыларын үөрэппиттэрин иһитиннэрдэ, наадалаах информация дьоҥҥо ситэ тиийбэтин, онон дьон үксэ ааҕар ватсап ситиминэн тиэрдэр наадатын бэлиэтээтэ.
Аҕыйах нэһилиэги анаалыстаан көрбүттэрэ: дьон 60%-на сонуннары – ватсаптан, 12-20%-на Телеграмм-каналтан ылаллар эбит, МАХ олох аҕыйах киһиэхэ баар.
Артур Яковлев нэһилиэктэр пресс-сулууспаларын сүрүн соруктарынан нэһилиэк имиджин тупсарыы, салалта үлэтин сырдатыы, буолаары турар Спортивнай оонньууларга бэлэмнэнии туһунан иһитиннэриилэри тиэрдии, нэһилиэктэр пресс-сулууспаларын уопсай ватсап бөлөҕөр тахсыбыт атын нэһилиэктэр үлэлэрин-хамнастарын, үчүгэй сонуннарын бэйэлэрин нэһилиэктэрин дьонугар тиэрдии, Ньурбаҕа, Дьокуускайга олорор биир дойдулаахтарбытын кытта ыкса сибээс олохтооһун, итинэн сибээстээн биир дойдулаахтарбытын ватсап бөлөхтөргө киллэрии буоларын бэлиэтээтэ.
Улахан глобальнай тэрээһини ыытарга аан маҥнай информационнай өттүн кыайдахха, дьону көҕүлээтэххэ эрэ тугу эрэ ситиһиэххэ сөбүн эттэ. Нэһилиэктэр пресс-сулууспаларын кытта маннык сотору-сотору көрсөн, Спортивнай оонньууларга туох былааннар бааллара, туох үлэ барара, туох кыаллыбакка турара, онно туох көмө наадата дьоҥҥо иһитиннэрэн иһиллиэхтээх.
Салгыы Артур Янович СӨ норуоттарын IX Спортивнай оонньууларын туһунан пресс-кэмпириэнсийэ оҥордо, киирбит ыйытыыларга хоруйдаата. 2027 с. от ыйын 7-11 кк. СӨ норуоттарын IX Спортивнай оонньууларыгар олимпийскай спорт 15 көрүҥэр күрэхтэһиэхтэрэ. 2,5 тыһ. спортсмен, 300-тэн тахса судьуйа, ону таһынан Дьокуускай уонна 34 улуустан дэлэгээссийэлэр, дойду атын эрэгийиэннэриттэн ыалдьыттар, култуурунай тэрээһинннэр кыттыылаахтара, спорт фанаттара, Дьокуускайтан биир дойдулаахтарбыт – барыта 30-ча тыһ. киһи кэлэрэ күүтүллэр.
Күрэхтэһиилэр 6 сиринэн ыытыллыахтара: Күндээдэҕэ – дуобат, саахымат, Сүлэҕэ – теннис, Чаппандаҕа – баскетбол, Ньурбачааҥа – стендовай ытыы, Антоновкаҕа – бокса, волейбол, буулдьанан уонна оҕунан ытыы, уоннааҕыта – Ньурба куоракка.
Оройуоҥҥа 8 эбийиэк тутуллан киириэхтээх. 3000 киһи олорор стадион кыһыҥҥы өттүгэр сүүрэр манежтаах буолар, спортивнай снаряд быраҕар, ыстанар сектордаах буолар.
Инникитин улахан тэрээһиннэр, кэнсиэртэр бу стадиоҥҥа буолар буолуохтара. Бүгүн 12 киһи үлэлии сылдьар, олорор сир каркаһын бүтэрдилэр, билигин кыратык хомунан баран сирин оҥорон барыахтаахтар. Эбийиэк бэлэм буолуута — 18%.
Физкултуурунай-чэбдигирдэр комплекска улахан дьон харбыыр бассейна, оҕолор харбыы үөрэнэр бассейнара, улахан тренажернай зал, фитнес зала, улахан баскетбол, волейбол, мини-футбол күрэхтэһиилэрин ыытар зал, массажтанар, медицинскэй хостор баар буолаллар.
Ити 2 эбийиэк икки ардыгар Ньурбалар спортивнай албан ааттарын аллеята оҥоһуллуоҕа. Итиннэ 30 бастыҥ спортсменнарбыт мөссүөннэрэ туруоруллуоҕа, араас сынньанар зоналар эмиэ баар буолуохтара. Атын оройуоннарга маннык тутуулар тус-туспа, киинтэн ыраах тутуллубут буоллахтарына, биһиэнэ барыта: паарка, стадион, ФОК, Кыайыы болуоссата бииргэ тураллара олус табыгастаах.
Чаппандаҕа улахан каркаскай зал тутулла турар, бу сайын бүтүөхтээх.
Күндээдэҕэ каркаһа бүтэн турар спортзал ситэриллиэхтээх, куонкурус бүттэ, тутааччынан «Масстрой» ХЭТ буолла.
Сүлэҕэ эмиэ «Үтүө дьыала» хамсааһын чэрчитинэн спортзал тутуллар, аукциона ыам ыйын 22 к. түмүктэнэр.
Антоновкаҕа күөн көрсүүлэр заллара тутуллар, тутааччы куонкурус түмүгүнэн быһаарыллыбыт. Үлэни СӨ Судаарыстыбаннай сакаасчытын сулууспата иилээн-саҕалаан ыытар. Тутуу матырыйаалларын таһа сылдьалллар.
Ньурбачааҥҥа стендовай ытыы былаһааккатын куонкуруһа бүтэн, бэдэрээтчит бу сайын үлэтин бүтэриэхтээх. Атын даҕаны хайысхаларынан элбэх бэлэмнэнии үлэтэ ыытылла турар.
IX Спортивнай оонньуу дириэксийэ нэһилиэктэр пресс-сулууспаларын үлэтин сүрүннүүр исписэлииһэ Спиридон Тимофеев сырдатыы үлэтэ хайдах барыахтааҕын туһунан санаатын үллэһиннэ.
«Ньурба оройуона» МО дьаһалтатын пресс-сулууспата.