Бүгүн Ил Дархан ыйааҕынан Саха сиригэр Оһуокай күнэ бэлиэтэнэр.
Ньурба куорат Ленин болуоссатыгар култуура үлэһиттэрэ бэлиэ түгэҥҥэ аналлаах бэртээхэй тэрээһини иилээн-саҕалаан ыыттылар.
Улуустааҕы култуура уонна ыччат бэлиитикэтин департаменын салайааччыта Розалия Тихонова мустубут дьону истиҥник эҕэрдэлээн туран, өбүгэ саҕаттан төрүттэнэн тиийэн кэлбит төрүт үгэстэри өрө тутар уонна тарҕатар дьоммутугар — сыана бэтэрээннэрэ, Ньурба улууһун Дархан этээччилэрэ Догуева Александра Васильевнаҕа уонна Семенова Изабелла Егоровнаҕа «СӨ уус-уран самодеятельноһын бэтэрээнэ» түөскэ анньыллар бэлиэни үөрүүлээх быһыыга-майгыга туттарда.
Итини таһынан элбэх киһиэхэ Махтал суруктар туттарылыннылар. Ол иһигэр оскуола үөрэнээччилэрэ бааллара кэрэхсэбиллээх. Бу саха төрүт үгэстэрэ, норуот тылынан уус-уран айымньыта бигэ туруктааҕын уонна кэскиллээҕин туоһулуур.
Добун түһүлгэ оһуокайын былырыыҥҥы улуус ыһыаҕын Дархан этээччитэ, СӨ үөрэҕириитин туйгуна Галина Гурьева, Ньурбатааҕы тыйаатыр артыыһа, СӨ култууратын туйгуна Дмитрий Слепцов, Сүлэ нэһилиэгиттэн Дарья Абрамова уо.д. таһаардылар. Бүгүн курас-тымныы күнү билиммэккэ, дьон сүргэтэ көтөҕүллэн оһуокай киэҥ түһүлгэтин төрүттээтилэр.
Геннадий АНТОНОВ