Ньурба 2 №-дээх оскуолатын кэннинэн, Ньурба к. Кузаков уул. 81 кыбартыыралаах дьиэ бэрт кылгас кэм иһигэр дьэндэйдэ.
Тутуу «Хаарбах дьиэлэртэн көһөрүү» судаарыстыбаннай бырагырааманан ыытыллар. Бу бырагыраама дойдуга «Инфраструктура для жизни» нацпроект чэрчитинэн үлэлиир.
Эбийиэк бэдэрээтчитинэн Дьокуускайдааҕы «Саха Билд» ХЭТ буолар. Быйылгы үлэтэ кулун тутар 17 к. саҕаламмыт буоллаҕына, аҥардас биэс ый иһигэр киһи сөҕө көрөр үлэтэ толорулунна.
Атырдьах ыйын 17 к. эбийиэккэ сылдьан тутааччылардыын көрүстүм. Биригээдэни прорабтар, Убайаантан төрүттээх биир дойдулаахпыт Станислав Павлов уонна Сунтаартан төрүттээх Виктор Герасимов салайан үлэлэтэллэр.
«Билигин үксэ иһинээҕи нарылыыр үлэтэ (отделката) барар, — диир прораб Станислав Павлов. — Дьиэ фасада сылааһы тутардыы эпсиэйдэнэн уонна штукатуркаланан бүтэн, кырааскаланара эрэ хаалла. Түннүктэрэ 100% турбуттара. Иһинээҕи отделката уонна таһынааҕы благоустройствота оҥоһуллуохтара.
28 киһи Таджикистантан кэлэн отделкаҕа уонна фасадка үлэлии сылдьаллар. Электриктэр Дьокуускайтан кэлбиттэрэ, түөртэр. Олохтоох 3 сыбаарсык уонна 5 сантехниктар эмиэ үлэлии сылдьаллар. Электриката «черновойа» барыта бүппүтэ, щитовойа хаалла. Канализация дьиэ анныгар эмиэ бүттэ. «Узел ввода» оҥоһулуннаҕына стояктарын тардан киирэн барыахтара. Суол нөҥүө компенсаторы кытта итиитии ситимэ тардыллан кэлиэхтээх. Онтон сылааһа холбонуоҕа.
Үлэ иҥнигэһэ суох биир күдьүс барар. Матырыйаала барыта баар, үбэ быһаарыллыбыта. Ахсынньыга дьиэбитин бүтэрэн үлэҕэ киллэриэхпит».
Геннадий АНТОНОВ