Ньурба к. 11 чаас саҕана Степан Васильев уулуссатынан Кыайыы болуоссатыгар үөрэх тэрилтэлэрин уонна Ньурба к. тэрилтэлэрин, «Өлбөт үйэлээх полк» холуонналара параадтаан тиийдилэр.
Аҕа дойду Улуу сэриитигэр охтубут, Улуу Кыайыыны аҕалсыбыт буойуннары кэриэстээн чуумпуруу мүнүүтэтэ биллэрилиннэ, салют ытылынна. Буойун пааматынньыгар уонна Иосиф Сталин бүүһүгэр гирляндалар, сибэккилэр уурулуннулар. Бэлиэ тэрээһин кыттыылаахтарынан Арассыыйа Дьоруойа Андрей Григорьев, СВО уонна бойобуой дьайыылар бэтэрээннэрэ буолбуттара тэрээһин суолтатын үрдэттэ.
Үөрүүлээх миитиҥҥэ Улуу Кыайыы 81 сылынан эҕэрдэлээн, улуус Сүбэтин бэрэссэдээтэлэ Нюргуяна Михайлова, улуус баһылыгын бастакы солбуйааччыта Василий Семенов, Арассыыйа Дьоруойа Андрей Григорьев уонна Ньурба куорат баһылыга Геннадий Игнатьев эттилэр. Кинилэр киһи аймах историятыгар хаһан да буолбатах элбэх сиэртибэлээх Улуу сэриигэ аҕа көлүөнэ дьоруойдуу хорсун быһыытынан Улуу Кыайыы сүҥкэн суолтатын бэлиэтээтилэр, эһэлэрин-хос эһэлэрин килбиэннээх суолларын салҕаан Украинаҕа нацизмы утары сэриилэһэ сылдьар хорсун буойун уолаттарбыт кыайыы көтөллөөх этэҥҥэ эргиллэн кэлэллэригэр баҕа санааларын тиэртилэр.
Кыайыы болуоссатыгар байыаннай параад ыытылынна. Элбэх күрэхтэһиилэр кыайыылаахтара, Ньурбатааҕы техлицей “Искра” байыаннай-патриотическай кулуубун кыттыылаахтара строевой хамсаныылары көрдөрдүлэр.
«Умнумаар дуу, уот сэрии умаппыт сулустарын» театрализованнай көрдөрүү, «Улуу Кыайыы оһуокайа», өрөспүүбүлүкэтээҕи «Бары уруһуйдуубут» бырайыак чэрчитинэн «Саллаакка — Кыайыылаахха албан аат» байыаннай плакаты уруһуйдааһын, чэпчэки атлетика эстафетата, «Кыайыы вальса» флеш-моб уо.д.а. буоллулар. Полевой куукуна үлэлээтэ, Олоҥхо дьиэтин таһыгар атыы-кутуу тэрилиннэ. Бүгүн Улуу Кыайыы 81 сылыгар аналлаах тэрээһиннэр салҕаналлар.
Геннадий АНТОНОВ
Ааптар хаартыскаларын кытта СӨ IX Спортивнай оонньууларын дириэксийэтин, Ньурба к. пресс-сулууспатын хаартыскалара туһанылыннылар