Балаҕан ыйын 22-23 кк. СӨ Бырабыыталыстыбатын Бэрэссэдээтэлин солбуйааччыта, СӨ норуоттарын IX Спортивнай оонньууларын тэрийэр кэмитиэт бэрэссэдээтэлэ Сергей Местников салайааччылаах оробуочай бөлөх кэлэн үлэлээтэ. Бастакы күннэригэр кинилэр Ньурбаҕа уонна нэһилиэктэргэ тутулла турар спортивнай эбийиэктэргэ уонна үлэлиир турар эбийиэктэргэ сылдьан үлэ хаамыытын билистилэр. Бүгүн Сергей Местников СӨ норуоттарын IX Спортивнай оонньууларын тэрийэр кэмитиэтин көһө сылдьар мунньаҕын салайан ыытта.
Мунньах кэнниттэн Сергей Местников санаатын маннык үллэһиннэ: «Биһиги – СӨ норуоттарын Спортивнай оонньууларын бэлэмниир оробуочай кэмитиэт бэҕэһээ уонна бүгүн Ньурба улууһугар үлэлээтибит. Бэҕэһээ күн устата тутулла турар спорт эбийиэктэрин көрдүбүт уонна күрэхтэһии ыытыллыахтаах үлэлии турар эбийиэктэргэ туох бэлэмнэнии үлэ барарын бэрэбиэркэлээтибит.
Ньурба улууһугар үлэ-хамнас олус тэтимнээхтик уонна киэҥник ыытылла турар. Сүрүн тутуу эбийиэктэригэр тутааччылар бары быйыл кыһын тымныылар түһүөхтэригэр диэри эбийиэктэр тас сабыыларын үлэтин бүтэрэн, кыһын устата ис үлэтин ыытар соруктаахтар. Сорук сүрдээх улахан, улуус уонна өрөспүүбүкэ өттүттэн күүстээх хонтуруолга тутуллар.
Бүгүн сарсыарда тэрийэр кэмитиэт мунньаҕар араас хайысхалаах боппуруостары көрдүбүт. Спортивнай күрэхтэри ыытыыга сүрүн сыал-сорук – дьон-сэргэ спортивнай тэрээһини көрөр усулуобуйаларын уонна күрэхтэһээччилэр күрэхтэһиилэригэр тоҕоостоох усулуобуйаны тэрийии. Биһиги хаһан баҕарар маннык спортивнай күрэхтэри ыытарбытыгар аан дойдутааҕы ирдэбиллэргэ сөп түбэһэн тэрийэбит. Тоҕо диэтэххэ, бу Саха сирин Олимпиадата буолар.
Оонньуулар култуурунай чааһын дьүүллэстибит. Култуурунай чааһыгар олус интэриэһинэй, дойду историятын, култууратын кэпсиир уонна аныгы технологиялары туһанар сыаллаах-соруктаах үлэни ыытыахпыт. Мин мунньахха өссө биирдэ тоһоҕолоон эттим: Бу Ньурбаҕа ыытыллар Оонньуулар дьон өйүгэр-санаатыгар үйэ-саас тухары уһулуччу үчүгэй өйдөбүллээх хаалыахтаахтар диэн. Онно бэйэбит историябытын, култуурабытын эрэ буолбакка, аныгы технологиялары, оҥоһуу өй кыаҕын туһанан, бу Оонньуулары дьон хараҕар уһулуччу үчүгэйдик быраҕыллар уонна көстөр гына ыытыахтаахпыт. Онон спортивнай уонна култуурунай тэрээһиннэр балачча уратылаах буолуохтаахтар диэн бэлиэтиибит.
Тырааныспар өттүнэн хааччыллыы боппуруоһун көрдүбүт. Манна элбэх дьон кэлиитигэр суолга-иискэ сэрэхтээх буолуу, спортивнай уонна култуурунай тэрээһиннэргэ кыттар дьону тырааныспарынан хааччыйыы, сөмөлүөттэр сырыыларын элбэтии курдук боппуруостары. Бүгүн олус бэрт саҥа көҕүлээһин этилиннэ: теплоходу аҕалан («Демьян Беднай» эбэтэр «Михаил Светлов») манна Оонньуу кэмигэр туруоруохха, сырытыннарыахха сөп этэ диэн. Итини биһиги эбии үөрэтэн көрүөхпүт. Үбү-харчыны ирдиир бырайыак буолуохтаах, ол эрээри сүбэлэһэн сөптөөх быһаарыыны ылыныахпыт.
Оонньууларга волонтердар үлэлииллэрэ былааннанар. Ыччат министиэристибэтэ волонтердары көҕүлээһин уонна үлэлэтии туһунан санаатын эттэ. Улуус бэйэтин сайаапкатын киллэрэн олорор. Эһиилги Оонньууларга манна сүүһүнэн олохтоох дьонтон волонтердар хомуллан күүс-көмө буолуохтара диэн эрэнэбит.
Билигин Спортивнай оонньууларга бэлэмнэниигэ үлэбитин тэтимиртибит. Оруобуочай бөлөхтөргө манна миэстэтигэр кэлэн олохтоох дьаһалтаны кытта үлэлэһэн, эбийиэктэри көрөн сөптөөх быһаарыыны ылалларыгар сыал-сорук туруордубут. Ону таһынан олохтоох дьаһалта, нэһилиэк баһылыктара, Ньурба улууһун олохтоохторо бары бүттүүн бу спортивнай тэрээһини ыытарга кыттыгастаах буолуохтаахтар. Биһиги, ньурбалар, бу Оонньууну маннык ыытыахтаахпыт, маннык бэлэмнэниэхтээхпит, биһиги маны тэрийиэхпит, ону оҥоруохпут диэн. Хас биирдии Ньурба улууһун олохтооҕо оннук сыһыаннаах буоллаҕына, Ньурбаҕа ыытыллар СӨ норуоттарын IX Спортивнай Оонньуулара үрдүк таһымнаахтык уонна дьон өйүгэр-санаатыгар уһулуччу үчүгэйдик хаалыаҕа диэн биһиги бэлиэтиибит».
Геннадий АНТОНОВ